2022-06-10 23:22:46
س/ بكسل أصلي ولو صليت بصلي وأنا قاعدة مع ان مافيش أي مشاكل صحية ايه الحل في الكسل ده وصلاتي وانا قاعدة دي تنفع ولا ايه
..............
ج/ أولا ..لازم تعرفي إن وقوفك في الصلاة ركن لو ماوقفتيش في الصلاة كده الصلاة باطلة ...الا لو ليكي عذر يمنعك من الوقوف طول الوقت فساعتها تصلي وانتي قاعدة
ثانيا ..عشان نعالج الكسل في الصلاة هنحتاج ..
_أول حاجه محتاجين عزيمة واصرار وتذكير نفسك بفضل الصلاة وانها صلتك بربك اللي بتحتاجيه في كل أمورك وياريت لو تسمعي أي درس قصير عن الصلاة
_تاني حاجه افتكري الوعيد الشديد لتارك الصلاة وان بين أي حد وبين الكفر ترك الصلاة وإن أول إجابة هيقولها أهل النار لسؤال (مَا سَلَكَكُمْ فِي سَقَرَ) ايه سبب دخولكم النار ؟؟!!....(قَالُوا لَمْ نَكُ مِنَ الْمُصَلِّينَ)
_أول ماتسمعي الأذان ...فورا تتوضي وتصلي ..ماتتأخريش ولا ثانية لانك كل مااتأخرتي ..هتلاقي الشيطان يكسلك أكتر و يشغلك اكتر لحد مايخرج وقت الصلاة ويبقى هو الكسبان
وياسلام لو اختارتي صحبة تشجعوا بعض على الصلاة في أول وقتها وتصحّوا بعض للفجر
_الفرض اللي تكسلي عنه اعملي لنفسك عقاب بس عقاب يوجعك عشان ماتكسليش تاني وليكن مثلا العقاب ..إنك هتطلعي صدقة بمبلغ كبير
_رتبي مواعيدك دايما مع مواعيد الصلاة ..مافيش نوم في وقت هيجي فيه صلاة
وماتخرجيش من بيتك غير وانتي متوضية عشان أول مايأذن تصلي (وطبعا تصلي وانتي واقفه حتى لو قدام الرجال)
_آخر وأهم نصيحة ..الدعااااااء
ادعي كتير بدعوة سيدنا ابراهيم رب اجعلني مقيم الصلاة ومن ذريتي ..
ادعي ربنا يعينك ويسهل عليكي العبادة
ادعي ربنا وقولي اللهم اني أعوذ بك من العجز والكسل
مع الوقت ..
هتتعودي إن الصلاة حاجة أساسية في يومك ومش هتفرطي فيها أبدااااااا بس اثبتي شوية وقت الكسل ...عشان توصلي
28 views20:22