2022-04-22 08:39:58
#لری لَمپا
اَلَنگاره لَمپا به پیشه بِهونُم.
که گاشَد شَوه شَه مو تِهنا بِمونُم.
خُره پِرپِروکُم به لَمپا دِر و فِر.
کُنه پِرپِر و دی، وَنه ری تیا کِر.
دِل اُزگُر به پِرپِر زِ لَمپایِ دیری.
تیا رَه گِرِهده، رَسی وَختِ پیری.
نِشینُم دِراهه مَهه نُو به وارُم.
بیاهه نِگارُم، بِشینه کِنارُم.
اِنُم دَستِ ری دِل زَنه هِی دَمونه.
که سُهده زِ دیری به تَشگَه زَمونه.
دِلُم کِرده پِرپِر نَمَند آرِمونِس.
نَوِیده گُل و مَه، شَهه آسِمونِس.
اِوِی باد و بارون تَکون خَردِ لَمپا.
تُکه هَرس اِچیره زِ تی دَردِ لَمپا.
تَشِس کور اَبیده گُرُه روشِنایی.
نِشینُم شَوه تار، اِپاهُم سِدایی.
بُهونُم مِنه لِف لَتِس وُرتَکِسته.
یَشُو کِرده لاشُم، دِلُم تُزگِهِسته.
خُدایا بِزَن تَش به لَمپا دِلِ مو.
که وُرگَرتِ یارُم بیاهه کِلِ مو.
___
کوروش دورکی بختیاری
#خودآفری
اَلَنگار اُزگُر : آویزان، در حال سقوط
لَمپا : چراغ فانوس
پِرپِر :: سوسو زدن، کم زیاد شدن نور، بیقراری بی تابی
پِرپِروک : پروانه
دَمونه :: خروشنده غضبناک، نفس زنان
لِف : باران شدید
لَت : نوارهای بافته شده از موی بز در سیاه چادر
وُرتَکِستِن :: دو تکه شده، پاره شدن
تُزگِهِستِن :: شکستن، پریدن لبه
یَشو : خیس آب
گاشَد : شاید
تی رَه گِرِهدِن : خیره شده، به دور دست نگاه کردن
تُک : قطره
کِر : مه آلود، چروک، گوشه گیر
117 viewsسلطان خانما, 05:39