2021-05-02 00:02:19
ياعلي
عليمن جايني العيد .. وابويه مسافر بعيد
منو يعوض مكانه .. يغطيني بحنانه
وابويه مسافر بعيد
رجاءاً گولو للعيد زينب واليتامه
يشوفونك اذا جيت مثل يوم القيامه
أذا مو والدي وياي على العيد السلامه
ضعت مابين الجروح وادورلي ابتسامه
شمعتي وشمعة البيت .. طفن وبحيره ضليت
العيد اشيلگه بيه .. سواد الهم عليه
جرح مايقبل يهيد
########
يبويه ومن يجي الليل تضل روحي اتمنه
تجيني وتگعد وياي واشوف الدنيه جنه
بدونك كل الوجوه ولا بيهه من اهلنه
وادور بالهوه الهاب ولانسمة محنه
غريبه ابعين الايام .. واعيش احساس الايتام
منو ايزور اليتيمه .. يعيد ابلايه خيمه
عليمن جاي شيريد
########
يافرحة التجي وياي وانا مضيعه الاماني
اشوفن بويه الهلال اذا طولك اجاني
حرت ما ادري دفنوك لودفنو زماني
ولا مشتاگه للعيد مشتاگتلك اني
ادورك بين العيون .. حلم ميت بالجفون
وحگ شوگي ولهفتي .. چنت كلمة يبنتي
يبويه اسمعها تجويد
#######
يدگ بابي الفرح جاي واني شباقي عندي
شألبس واني الجروح تفصال اعله گـدي
نشاز البسمه ياعيد والدمعه اعله خدي
يتيمه وجنحي مكسور احس الدنيه ضدي
اطير وجنح الأيام .. يذبني ابين السهام
اليتيمه ابعز فرحها .. حمامه ابلا جنحها
زمن مايرحم ايصيد
########
اذا الوادم يعيدون واريد اكتم عبرتي
واكابر واخفي الدموع واضم عنهم دمعتي
اثر لغيابك الناس يشوفونه ابوجنتي
بدونك صورة مرسومة ابصفنتي
ارسمك دمعة فراگ .. واهيم ابنار الاشواگ
يجي العيد اعله بابي .. يعزيني ابشبابي
غـزت وجهي التجاعيد
##########
بقيت اتوسل الطيف يجيبك لحظة ليه
اگلك نار الفراگ جمرها اشسوه بيه
بعد كل هاي الهموم ورايه الغاضريه
مقسومتلي كل عيد دمعتي اتحني اديه
تجيني الفرحة شتشوف .. صرت اوف ابكتر اوف
الجرح من الطفوله .. نهاية عمري طوله
حزن ماينقص ايزيد
#########
ورايه ابگد الاحزان والهموم العشتها
حيرة ابكربله هناكه ولاعمري شفتها
اوادع عالنهر روح واموتن لوعفتها
لاخويه مهرة الموت بديه قدمتها
واقبله ابصدره واحتار .. اطفي ابدمعتي النار
واروحن بالنهايه .. انا وخدري سبايه
اسيره امچتفه الإيد
#########
كلمات الشاعر المبدع : احمد الذهبي
#نسالكم_الدعاء
كلمات خادم الزهراء ع ملا علي
@MOl_ail
#قصائد_استشهاد_العباس_ع
@yy555h
#ابوذيات_نعي_مكتوبه_وملحنه
@bhp18
____
قصائد خالدات مكتوبه
https://t.me/lrtyhu18
321 views21:02
ق
