خويَه وَينك .. وَحشَه مااﮔدَر أنَام خويَه وَينك .. تارِس عيوني | الشاعر لقمان لعيبي البدران

خويَه وَينك .. وَحشَه مااﮔدَر أنَام
خويَه وَينك .. تارِس عيوني الظلَام
اِلـﮔمَر ماحِس ابوجُودَه
اوّين ارُوح الدنيه سُوده
وانطفَـت حتّه الخيَام
خويَه وَينك .. تارِس عيوني الظلَام
***
خويه رَغم اخيَامي جَمره وخِدري اصبَح كالهَشيم
النَار ردّت عنـّـي وَحشه وضَوّت الكون الإلِيم
وابضِوَاها ﭼنت ارَاقِـب اهنا يتيمَه اهنا يتيم
اهنا صِبع مـﮔطـُوع اشِيلَه اهنا عَـبايه اهنا حَريم
واليتـَـامه .. ﭼنها اسرَاب الحمَـام
خويَه وَينك .. وَحشَه مااﮔـدَر أنَام
***
خويه لِيله ومِـن ثِـﮔـلهَا تنحِني السَـبع الشِدَاد
ليله مو مثل الليَالي انصبغَت بلـُون السَـواد
لو عمـر عِشرين عـندي يمكِـن اتحَمّـلها عَاد
شلون يَبن الزهرَه وآنه عمري عالخَمسين زَاد
والهضِيمه .. اعليّه مَمنوع الكَلام
خويَه وَينك .. وَحشه مااﮔدَر أنام
***
خطوَة اجدَامِي مَتاهَه وايـدِي تتوَﭼّـه ابعَذاب
ﭼفـُوفي جَمرَه امتُوني نار ورَاسي غطّاه التِراب
مِثلي لِـيلـه ومثلي سِكنه ومِثلي مَهمومه الربَاب
احتَارَن ابفـﮔد الغَوالي وتالِـي حَارَن بالحِجاب
والنتِـيجه .. اقرَينه عالخِدر السَلام
خويَه وَينك .. وَحشَـه مااﮔدَر أنام
***
اسمَعـِت من ابعِيد وَنـّـه اتذوّب اﮔلـُـوب الحَديد
ونـَبرَة الصوت اعرَفِـتها وخلّت احـزاني تِـزيد
بويه مَحرُوﮔـات اديـّـه وَينك احضَر يالعِجيد
هَـايه اثارِيهَـه رُقيـّه اتنـَـادي والِدها البعِـيد
اهتَز كيَاني .. وﮔلبي مِن اضلُوعي هَام
خويَه وَينك .. وَحشَـه مااﮔدَر أنام
***
خويـَه وَينـك ماتجيني وتـﮔطَـع اصوَات النيَـاح
ارد احِط راسي اعلى صَدرك واشعر اتطِيب الجِراح
وَلـَو يابو اسكِينه ادري بِـينه ناعِي الفرﮔـه صَاح
وادري ميعـُود التِهَـشـّم وابد مَـاايرِد الّي راح
وعالليالي .. بعـَد ماينفـَع مَلام
خويَه وَينك .. وَحشَـه مااﮔدَر أنام
—----------------------------------
لقمان لعيبي البدران

@lukmanalbadran