الشاعر محمد الحلفي

2022-08-02 01:04:57 أقبلني بمأتمك يا ثار الله
جرحك ويّه الخدم أبچي وأنعاه
نتشارك بالدمع والهم والأه
يالما ناسيني جرحك عيب انساه

يالطحت اعله الترب وجروحك نزفت ومحد شالاك
يالگلبك من عطش من ردت انت العذب ياهو اتعناك
ياهو اتعناك ـ يا حافر أول اتعنه وداساك

محتار وارد اسألك يا سبط الرسول
يالجرحك عيشته بنص گلب البتول
أعذرني إبهالحچي مولاي امنگول
معقوله انت الحسين وجوه الخيول

يا لثارات الحسين
ــــــــــــــــــــــــــــــــــــــــ
يحتار بدنيته الما ظل اوياك
يا معنه العيشته العاش ابلياك
كلهه تروح وتجي وشامخ ذكراك
لبيك يا حسين شلون انساك

كلشي بهالدنيا من دونك ما يسوه يا دمعات العين
يا نبضات الگلب لو ما انت متت والمثلك وين
والمثلك وين ـ يالكلشي منخلق لجلك يحسين

كل ما عنك أبتعد أرجع من جديد
أنت السيد وآنه واحد من العبيد
جرحك ما استبدله وبس جرحك أريد
الما مجروح إلك احساسه اشيفيد

يا لثارات الحسين
ــــــــــــــــــــــــــــــــــــــــ
روحي من البچي كون ابلا حيل
من دمعات الحزن ياخذهه السيل
اتواسي اليبچي دم كل صبح وليل
چا صدرك ما سلم من سحك الخيل

أيامي بالألم خل أگضيهه فلا رايد أرتاح
المثلك سيدي كلش تهضم إذا عطشان وطاح
عطشان وطاح ـ والأكثر گلبك اشگد ضامي صاح

العده ليش تحاربك وانت اهل السلام
يا نور الله وهيبته ويا سيد الأنام
ليش ارخص كل البشر يذبحله إمام
قرأن انت اشعجب مرمي بالسهام

يا لثارات الحسين
ــــــــــــــــــــــــــــــــــــــــ
ارحمني برحمتك يبن الاطهار
گلبي لا تتركه وعنه تندار
انت اهله وعالمه وانت اجمل دار
الدنيا ابلا وجودك مثل النار

وين امشي لو رحت يا نسمات الهوه يا اغله الناس
كلبي مثل الحجر من جفك لامسه بي صار احساس
بي صار احساس ـ ضل يبجيلك لأن جثه ابلا راس

مطروح ومن العطش ما يجري دماك
آنه وكل ما أملكه يالغالي فداك
ماكو مثل امصيبتك والذباح اجاك
كلشي ضج ابكربله وبذبحك بچاك

يا لثارات الحسين
ــــــــــــــــــــــــــــــــــــــــ
لمصابك بالألم خل تبجي الروح
وبطاري منحرك تكثر لجروح
يالخليت العوالم كلهه اتنوح
من صاحت فاطمه اه يالمذبوح

صيحتهه البالدمع يوليدي ابجم سهم صدرك مصيوب
يا سيف ويا رمح يُمه اكثر ألمك وانت المسلوب
وانت المسلوب ـ والتهظم عالوجه جسمك مگلوب

وجهك ضل ما ينعرف من كثر الدمه
واجروحك ما تنحسب يا حزن السمه
خدك من حر الرمل بيمن إحتمه
واعداك ابوكت الذبح كلهه امحزمه

يا لثارات الحسين
ــــــــــــــــــــــــــــــــــــــــ
محرم الحرام
٢٠٢٢ باز کردن / نظر دهید

2021-12-25 18:07:19 بعيدين وبعد أكثر بعدناك
وخذينه الدنيا ضحكه وإنت عفناك

الخلل لا بالزمن لا بالمسافات
إبعماها كلوبنه الردناها تلكاك

اشترينه الما يجيبك والملذات
اشكثر جَف الخجل بوجوهنه اوياك

الذنوب استعبدتنه وحبنه للذات
أخاف نصير من تظهر من اعداك

السوالف تبقى سهله وهيه كلمات
تعال اووين انت وطال فركاك

إخذ من عدنه أشعار وشعارات
ويمر إسمك عتب بس ياهو يقراك

يلمنه الليل وانت الوحدك اتبات
ونذكره اللي نسانه وما ذكرناك

النفوس املوثه وبيهه الصدك مات
الفلا ننساك بعد شويه ننساك

أختصاراً للكلام وللعبارات
الصدك مو من صدك احنه انتظرناك
ــــــــــــــــــــــــــــــــــــــــــــــ
للشاعر محمد الحلفي
٢٠٢١ باز کردن / نظر دهید

2021-08-23 18:17:18 مو دربنه
انت يا درب السبي لا مو دربنه

مو دربنه
انت رايد يا درب يكثر هضمنه

مو دربنه
إحنه ما نمشي بدرب يحني ضهرنه


يا درب كل خطوه نمشيهه بألمنه
يا درب لا تعطش وتطلب دمعنه
يا درب ما تسمع الون من گلبنه
واشبعد ما بَسَّك اتغيَّر اسمنه


لا تدوّر بينه عالأكثر عزيزه
لو تدوّر ما تميّز من وضعنه
يا عزيزه التبقى ما بين الشماته
والشماته انعرفو ابطيحت زلمنه


يا درب من تمشي مهيوبه الأميره
والخدم تخدمهه لو طلعت مسيره
والإله كلمه يدوّر بس رضاها
وكلشي يتغير إذا صارت أسيره


القبل ما فَكروّ حته بإسمهه
هسه يطرونه لأن فگدت عشيره
يادرب والتهضم العباس اخوها
وتمشي مسبيه بوكت حر الظهيره


العطش ما تطفى ناره اللي ابضعنّه
وتدري ما يرحم زغيره اولا چبيره
والتسولف عالعطش يكثر عطشهه
واليسَكتوها تعيش السكته حيره


والله حيره وبينه متكسره الخواطر
والله حيره والسبونه ابلا ضماير

يا ضماير يا مشاعر تبقى بيهم
واهما فوك ابن امي جابوها الحوافر


يا درب ما تدري بالطفله رقيه
ما يفارگها ولا يگدر أبوها
ينكسر گلبه لواً يسمعها تبچي
وهيه ورده وهوَّ ماي وعطّشوها


التطيح امن التعب غير الهه راحه
وهيه طاحت بس ولا مرّه ارحموها
وذاكَ راسه الـ عالرمح وشلون اگله
يا أُخوي ابنيتك وروحك سبوها

مو دربنه
انت يا درب السبي لا مو دربنه
وإحنه ما نتمشّه الا اويه الكفلنه
ــــــــــــــــــــــــــــــــــــــــــــــ
للشاعر محمد الحلفي
١٤٤٢ باز کردن / نظر دهید

2021-04-15 19:31:00

باز کردن / نظر دهید

2021-02-23 02:21:28 يمحمد يخويه ما دريت اشصار
من طف كربلا ما جتك الاخبار
گصدوها الخيم بالنار اهل النار
حرگوهن علينه وجمر چوانه

ما بين العساكر صارت احوالي
وبذيچ الخيول انسحكت اطفالي

صرت محتاره
دمعتي بعيني
تهت بالحومه
ومنو يدليني

حسين أباعبدالله
ــــــــــــــــــــــــــــــــــــــــ
من حرگو خيمنه صرنه مشدوهين
والمن نتجه ياخويه محتارين
صاحو كل زلمكم ذوله مذبوحين
نار اخيمنه اهون من حچي اعدانه

صرنه ابلايه والي وزادت الحيره
واضح من حچيهم ميّته الغيره

بعد يا والي
عگب ولياني
ابفگد ابن امي
انسلب صيواني

حسين اباعبدالله
ــــــــــــــــــــــــــــــــــــــــ
ودعنه الأهل بس يختلف لوداع
مشدوده الأيدين واهما فوك الكاع
وبطيحة گمرنه اختلفت الاوضاع
صار الماله قيمه يحجي ويانه

وبدرب السبي من عدنه راح الحيل
صرنه اويه النهار انطبكه مشي الليل

القبل مهيوبه
صفت مسبيه
مشت متعوبه
وبعد محنيه

حسين أباعبدالله
ــــــــــــــــــــــــــــــــــــــــ
علويات مسبيات محتارات
عطشانات محزونات مقهورات
متعوبات متعذبات متحسرات
مشدوهات بالأهات ممشانه

هذا اللي سمعته وفوگه بعد اكثر
گوه نمشي خطوه وخطوه نتعثر

اليطيح اگباله
تطيح ادموعه
منو اليفزعله
التوجعه اضلوعه

حسين أباعبدالله
ــــــــــــــــــــــــــــــــــــــــ
أرض الشام بينه اشسوت اشخلت
يا دمعت عزيزة اعله الوجه هلت
چم طفله اعله ابوها عمداً انسألت
چم شامت يخويه بحچيه أذّانه

محتارين حگنه والعده صوبين
لاٰرض الشام صاحو جبنه ضعن احسين

وكتهه إلمن
وجهنه انديره
مشينه ابحيره
وگفنه ابحيره

حسين أباعبدالله
ــــــــــــــــــــــــــــــــــــــــ
للشاعر محمد الحلفي
٢٠٢٠ باز کردن / نظر دهید

2021-01-27 02:06:52 قدوه ونعمه للناس
بيهه تباهى الإحساس
فاطمه ام العباس

كلمتها بدمع العين
فدوه اولادي لحسين

فاطمه ام العباس
ـــــــــــــــــــــــــــــــ
عليهه كلمن يسولف
يضيع بنص فضائلهه

يحير وحگه من يحتار
يا كلمه التقابلهه

مثلهه ربنا ما خالق
وحق الدمعه لتهلهه

لجلهه الجنه مو منزل
عزيز الزهره منزلهه

تحچي بدمع العيون
خل ابنيني يموتون
كلشي لمولاي يهون

وين الگه مثله وين
فدوه اولادي لحسين

فاطمه ام العباس
ــــــــــــــــــــــــــــــــ
وفيه ومن يگلهه حسين
يا يمه تجر حسره

تدنك وبخجل تحچي
سلام الله على الزهره

تگله يا هلي وروحي
شخدمك أبقى لمقصره

وحقك انت وعيونك
عليّه فضلك اشكبره

بيمن اگدر افديك
شكراً مثلي تحاچيك
ما أدري اشأجازيك

بس تبقى اليُمه دين
فدوه اولادي لحسين

فاطمه ام العباس
ــــــــــــــــــــــــــــــــ
الهي بإسمك اتوسل
تگله بدمعه وبونه

حبيبك يا بديع الكون
اريد اكثر اخدمنه

بخدمته ما أمل واتعب
ولا أگدر اعوفنه

أموت بسرعه من يبعد
أعيشاً من أشوفنه


كلشي ماريدنه
لا جاه ولا جنه
بس يسلم اتمنه

هسه اُمنيتي وبعدين
فدوه اولادي لحسين

فاطمه ام العباس
ــــــــــــــــــــــــــــــــ
تسولف ويّه ابو اليمه
حنينه وكل حچيهه احساس

إذا رادت تگول اسمه
احتراماً چفها فوك الراس

تقبّله بنحره وتشمّه
حرز تقره الفلق والناس

أحبك واكثر تگله
من اوليدي الگمر عباس

انت الكلشي بدنياي
عمري وروحي وسلواي
يبن الزهره ومولاي

أحچيهه بوجه البين
فدوه اولادي لحسين

فاطمه ام العباس
ــــــــــــــــــــــــــــــــ
لواً موجوده باٰرض الطف
گلبها بيا وضع تلگاه

عله حر الترب طايح
يلوج امن العطش بدماه

مصيبه وأكثر وأعظم
توسد والشمس فوگاه

أظن لو شافتْه ميّت
تموت ام البنين اوياه

العدهه اغله من الروح
ضامي ودامي ومذبوح
ما تتحمل لجروح

لا جرح اولا جرحين
فدوه اولادي لحسين
ــــــــــــــــــــــــــــــــ
للشاعر محمد الحلفي
٢٠٢٠ باز کردن / نظر دهید

2020-12-28 08:35:50 دارچ فاطمه
خيمه بكربله
باچر تحترگ
فوك العايله

باچر چنچ تطيحين
وبأهچ علي تصيحين

وانتي امألمه
ــــــــــــــــــــــــــــــــ
يا أم الحسن باچر
تطيح بكربله دارچ

من اعداكم يحرگون
خيمة زينب اسرارچ

يضل بيهه لهيب النار
وانتي البالگلب نارچ

حسرتچ انتظار اهناك
مثل الينتظر ثارچ

صاحب الزمان
ثارچ ينتظر
يوميه يشوف
ضلعچ ينكسر

يسمع لمن اتونين
وبأهچ علي اتصيحين

وانتي امألمه
ــــــــــــــــــــــــــــــــ
ما بين الخيم والدار
نار وعسكر وصيحه

أشو صار الخطأ ينعاد
غير الأوله تصحيحه

يالزهره ابدفعته الباب
گلبچ آه يتجريحه

ورقيه ابدفعة السلاب
بيهه شتجرح الطيحه

طحتي بشوغتچ
وانتي بدمعتچ
باچر وبهضم
ترجع طيحتّچ

إلمن باچر اتحنين
وبأهچ علي اتصيحين

وانتي امألمه
ــــــــــــــــــــــــــــــــ
ما رحمو ضعف حالچ
ولا رادو يرحمونچ

قصدهم مو كسر اكثر
وره المُحسن يموتونچ

نفسهم باچر ايرجعون
وانتي الدمعه بعيونچ

يسحگون الطفل لو طاح
بالخيل ويذبحونچ

آه يا كربله
يا معنه الألم
حته اترف طفل
منهم ما سلم

حيره وحگچ اتحيرين
وبأهچ علي اتصيحين

وانتي امألمه
ــــــــــــــــــــــــــــــــ
يا معنه وجود الكون
ضلعچ ما يتركونه

نفسهم يالزچيه اهناك
بالطف هم يكسرونه

يصير اعله الترب جرحچ
ولا يلگه اليعينونه

مصيبه وصعبه صدر حسين
بالحافر يسحگونه

ضلعچ ينكسر
يالزهره البتول
مره امن الدفع
مره امن الخيول

وبكل مره تحتضرين
وبأهچ علي تصيحين

وانتي امألمه
ــــــــــــــــــــــــــــــــ
الطُغاة اللي احرگو دارچ
تموتين ويعيدوها

خدركم خيمه بالعاشر
عله ابنيتچ يحرگوها

مثل ما حرتي بالبسمار
زينب هم يحـَيـروها

تحير وحگها من تحتار
كلشي ولا يشوفوها


تطلع وبركض
يا يمه تصيح
دخان وجثث
وبهمها تطيح

من كثر الهضم تبچين
وبأهچ علي اتصيحين

وانتي مألمه
ــــــــــــــــــــــــــــــــ
للشاعر محمد الحلفي
٢٠٢٠ باز کردن / نظر دهید

2020-12-04 23:12:15 محزونه وبلا حيل من كثر الحزن
دفعو عليچ الباب گالو چا وإن
يالزهره حگنه الهاي من نبچي ونون
من ضلعچ المكسور متّي امألمه

مظلومه مظلومه ماتت فاطمه
ــــــــــــــــــــــــــــــــــــ
ابدارچ الألطاف كلهه تنوجد
سجدة شكر لله بيهه تنسجد
حرگو عليچ الدار شو أهل الحقد
مو انتي بنت المصطفى والعالمه

مظلومه مظلومه ماتت فاطمه
ــــــــــــــــــــــــــــــــــــ
يالما سلمتي وطيّحو منچ طفل
مُحسن طلع للكون لكن منقتل
الحاربوچ اسلامهم ما ينقبل
لا والمُجامل يعني ضد حامي الحمه

مظلومه مظلومه ماتت فاطمه
ــــــــــــــــــــــــــــــــــــ
اليرضى عالعادوچ هذا ابلايه دين
مثل الهجم عالدار ويّه المجرمين
دين الله انتي وشيعتّچ عدهم يقين
ابلا وجودچ ماكو أرض ولا سمه

مظلومه مظلومه ماتت فاطمه
ــــــــــــــــــــــــــــــــــــ
يا كوثر القرأن يا نور الكتاب
بمصيبتچ باقين ما ننسه المصاب
ما ننسه عصروچ ابوسط حايط وباب
ابصدرچ البسمار متحنّي بدمه

مظلومه مظلومه ماتت فاطمه
ــــــــــــــــــــــــــــــــــــ
كون الخلافه ينوجد بيهه السلام
المو كفوها اشعنده ماخذهه اقتحام
الخله ضلعچ ينكسر رادوه إمام
الظالم اتريده النفوس الظالمّه

مظلومه مظلومه ماتت فاطمه
ــــــــــــــــــــــــــــــــــــ
للشاعر محمد الحلفي
٢٠٢٠ باز کردن / نظر دهید

2020-09-21 09:58:07 مو دربنه
انت يا درب السبي لا مو دربنه

مو دربنه
انت رايد يا درب يكثر هضمنه

مو دربنه
إحنه ما نمشي بدرب يحني ضهرنه


يا درب كل خطوه نمشيهه بألمنه
يا درب لا تعطش وتطلب دمعنه
يا درب ما تسمع الون من گلبنه
واشبعد ما بَسَّك اتغيَّر اسمنه


لا تدوّر بينه عالأكثر عزيزه
لو تدوّر ما تميّز من وضعنه
يا عزيزه التبقى ما بين الشماته
والشماته انعرفو ابطيحت زلمنه


يا درب من تمشي مهيوبه الأميره
والخدم تخدمهه لو طلعت مسيره
والإله كلمه يدوّر بس رضاها
وكلشي يتغير إذا صارت أسيره


القبل ما فَكروّ حته بإسمهه
هسه يطرونه لأن فگدت عشيره
يادرب والتهضم العباس اخوها
وتمشي مسبيه بوكت حر الظهيره


العطش ما تطفى ناره اللي ابضعنّه
وتدري ما يرحم زغيره اولا چبيره
والتسولف عالعطش يكثر عطشهه
واليسَكتوها تعيش السكته حيره


والله حيره وبينه متكسره الخواطر
والله حيره والسبونه ابلا ضماير

يا ضماير يا مشاعر تبقى بيهم
واهما فوك ابن امي جابوها الحوافر


يا درب ما تدري بالطفله رقيه
ما يفارگها ولا يگدر أبوها
ينكسر گلبه لواً يسمعها تبچي
وهيه ورده وهوَّ ماي وعطّشوها


التطيح امن التعب غير الهه راحه
وهيه طاحت بس ولا مرّه ارحموها
وذاكَ راسه الـ عالرمح وشلون اگله
يا أُخوي ابنيتك وروحك سبوها

مو دربنه
انت يا درب السبي لا مو دربنه
وإحنه ما نتمشّه الا اويه الكفلنه
ــــــــــــــــــــــــــــــــــــــــــــــ
للشاعر محمد الحلفي
١٤٤٢ باز کردن / نظر دهید

2020-09-20 18:43:59 من طحت يم النهر يا كافلّي
طاح وَيّاك الأمان الچان الي
ــــــــــــــــــــــــــــــــــــــــــ
الشماته ليّه من طحت اعتنت
وين چانت من چنت ما بَيّنت
تدري جَيّتهم يخويه اتضمّنت
نار فوك اخيامي وتظل تعتلي



نارهم لــمّن طفت لا ما طفت
تسعر بگلبي يبو فاضل بقت
موّتـتـني منهم احچايه انحچت
هايه زينب هيه هايه بت علي



آنه زينب مو مثل زينب قبل
غيّـرتني فرگتك يابا الفضل
صرت احيرن وانهضم من أنسأل
يا غريبه هم إلچ باقي ولي



ما بقى منكم ولي بس العليل
اولا عشيره الظلّت اولا ظل كفيل
ريته چفك يمسح الدمع اليسيل
ويمسح آثاره ويسَـكّـت عـاذلّي



العواذل خويه سَـمـعَتني المِحَن
گالو انت والحُسين ابلا چفن
ما أسولفلك عله گلبي لأن
أدري گلبك من جروحك ممتلي



گلبك الينبض حنان ابكل وكت
من وگف نبضه اختلف وضعي وطحت
ما قويت اتمرمريت وأيَّـست
من حياتي وروحي يا روحي وهلي



أنت روحي العوَّدتني امدلله
وكلشي يجرحني چنت ما تقْبَله
هسه محتاره وغريبه بكربله
وماكو واحد خويه گلي اتدللي



يا دلالي يابو فاضل يالحنين
ليّه چانت ضآمرّه ذيچ السنين
بس رحت من عندي دولبني الونين
وهدلي حيلي وحيلي ماهو الأوَّلي



حيلي أنت ومن طحت ما ظلّي حيل
عالترب سايل دماك ودمعي سيَل
ليلي من أنت چنت ما چَنـّه ليل
ويا گمر عگبك إلي يا كافـلّي
ــــــــــــــــــــــــــــــــــــــــــ
للشاعر محمد الحلفي
١٤٤٢ باز کردن / نظر دهید