واحد بحكي قال : قاعد في الجامع بعد الصلاة ، كان جنبي شافع صغير | #القلب_الازرق 💙🦋🦋
واحد بحكي قال : قاعد في الجامع بعد الصلاة ، كان جنبي شافع صغير رافع ايدينو وبدعي ، جيت جنبو لقيتو بقول : " ياا رب خلي حمودي يلعب معاي " ، " براءه شديده " ، قلت ليهو ربنا بيستجيب ليك؟! ، قال لي : أي ، كل ما أتشاكل مع زول بدعي وبنتصالح .. قال لي : أبوي قال " الدعاء دا ممكن يعمل أي حاجه " .. براءة الشافع دي خلتني أرفع يدي طوالي وأدعي ، سكت لغاية ما انتهيت وقال لي : إنت متشاكل مع منو ؟! .. ابتسمت وقلت ليهو : ناس كتار ، قال لي : ما تخاف ربنا عندو وقت لي أي شي ، وممكن يستجيب لينا كلنا في نفس الوقت " أبوي قال لي كدا " .. في اللحظه دي حسيت إنو في زول بنصحني بطريقه بسيطه وجميله وصادقه جدا .. صليت ركعتين ، ودعيت تااني ، وأنا ملازم للدعاء من اليوم دا ..
