2022-07-27 13:38:02
ذلت الاف الزلم
زينبٌ وازينبا
................
هاي زينب يابشر... بت علي واخت الكمر
يمها راكع جم نهر..الشافها بهمه انصدم
حيرتها كربله...منها يرجف حرمله
الضدها بالموت ابتله.. وبيدها يرف العلم
بالشكل حيدر اميره وتشبه هواي الحسن
قدمت بالطف ولدها بيهم العسكر صفن
عون سيد بالحرب...للشمر يبس كلب
يمه ما يصعب صعب...والشمر منه انهزم
جنها عباس الشهم
.............
هيبه تمشي باليسر...كسرت خشم الشمر
جنها عباس البدر...زينب الما تنولي
منها ماكو اي مره...بيها هيبه حيدره
كلها غيره ومفخره...مني اسمع مايلي
عالهزل جنها اميره كلها غيره مبختره
محد اللي فتح حلكه يمها كلها محيره
حيرت كل العقول...بت علي فحل الفحول
تشبه هواي البتول...الشمر يمها جاهلي
عالمه بلايه علم
............
للقصر من ادخلت...الجيوش تبهذلت
القاده منها تلابدت...والقصر يمها ركع
الشمر دمه جمد...وحرمله بخوفه لبد
منها العسكر شرد...والعرش الها وكع
اني اول مره اشوفن من مرة ترجف زلم
ناس تلبد ناس تشرد ناس منها تنهزم
الركز الها بالنظر...ظهره من خوفه انكسر
جيش الها ما كدر...كلها طلعت بس بدع
كلها صاباها الكتم
................
بالقصر من اخطبت...الزلم كلها تخورست
والحشود تصافنت.. كل حجيها مو سهل
كيدك انت خل يكيد...منها ظل يرجف يزيد
تكله اني اخت الشهيد...وانت ابنمن يانذل
اسعه سعيك واني احذرك بس ذكرنه اللي يظل
انت اهلك خلل بيهم واني بت خير الاهل
منين انت يا نسب...واني بت شيخ العرب
وانت ابن ذاك الغصب...اليقره بيكم هم يمل
القاده منها تنصدم
...........
الماعرفها خي عرف...زينب الما تنوصف
تجتف وما تنجتف...بيها تتباها السمه
مراه وبهيئه نبي...تعادل الفين اجنبي
تسبه بس ما تنسبي ... جنها امها فاطمه
شرف الله هيه زينب عالعساكر قائده
بت علي وبت الزجيه يعني زينب سيده
للستر خلت ستر...تكسر وما تنكسر
تعصر الدنيه عصر...وببوفاظل هايمه
يمها كلشي ينعدم
...............
العدها اخو مثل الكمر...مايمر بيها خطر
ويدخل الكون بحذر...لو تجر زينب نفس
هيبه تبقه بكل وكت...مريه منها ماشفت
منها اني تعلمت...علمتني جم درس
الكمر حته بمامته هوه كافلها يظل
تعلمت منه البطوله يعني اخوها شكد بطل
ماكو ابد من غيرته...تبقه تصدح سيرته
وفه تنكط كصته...جم عدو يمه انتكس
الجيش منه ينهزم
.....
منتظر صالح الكعبي
43 views10:38