بعد عشرين سنة مرت عليا في مجال الجرافيك و التدريب في الوطن الع | مرجع المصمم
بعد عشرين سنة مرت عليا في مجال الجرافيك و التدريب في الوطن العربي حبيت أنقل لكم خلاصة تجربتي المتواضعة .. و هي مجرد اخذ بالأسباب ، و التوفيق كله من عند ربنا و تتلخص النصايح في الجانب ( التخطيطي و التطويري - الإبداعي - النفسي - الصحي )
1 - الجانب التخطيطي و التطويري فكر و خطط وأنت فى أول طريقك و شوف نهايته .. علشان لو معملتش كده العمر هيجري بيك من غير ما تحقق أي شيء ، أول تلت سنين ليا في المجال كنت ماشي كده وخلاص و مش عامل لنفسي هدف و ده كان بيضيع وقت و مجهود كبير.. فبحثت و توصلت لـ التخطيط الاستراتيجي ليا كا مصمم بتحط لنفسك فترة زمنية من 5 ل 10 سنين .. خطة بعيدة المدي .. حدد حلمك اللى عاوز توصله .. و الخطوات العملية اللى هتنفذها على أرض الواقع يبقى ( الحلم و التخطيط التنفيذي ) بتكتب ايه اللى انت محتاجه بكل تفاصيل بأسلوب واضح و منظم من تنمية مهرات و تطوير في المجال .. وخالى بالك لازم تكون اهدافك واقعية وتنفع تنفذها علشان ميحصلش ليك إحباط و تستسلم .. من فترة للتانية بتراجع اللى انت كتبته و نفذت منه ايه وايه اللى ناقص و معملتوش علشان تعوض و تعمله .. تبتدى تشوف نقط قوتك و تظهرها و نقط ضعفك تعالجها . توماس هنري هكسلي بيقول "حاول أن تتعلم شيئاً واحداً عن كل شيء، وكل شيء عن شيء واحد" يعنى فى مجال الـ Design اعرف فكرة عامة عن جميع التخصصات و الاستيلات المختلفة فيه و اجربها و اكتر حاجة تشدني و احبها اتخصص فيها .. متحرمش نفسك انك تجرب . Brand Identity - Retouch & photo manipulation -Illustration - Digital painting - Motion Graphic - Matte Painter - 3D Dimension - Visual effects VFX و متضيعش وقت كبير فى كل تجربة .. انت مجرد بتاخد فكرة .. لان وقتك هو حياتك وأكتر حاجة تشدك و تحسها هى اللى تتخصص فيها و ساعتها هتوصل لنتائج مذهلة
2 - الجانب الإبداعي إذا حابب تدخل عالم الـ Graphic Design أو فعلا هو مجالك .. محتاج تعرف لغة .. اللغة دى هي اللى هتسهل عليك إنك تدخل عالم الإبداع من أوسع أبوابة .. و بكل سهولة و اللى اقصده هنا مش الإنجليزي ولا الفرنساوي .. أقصد .. لغة الإبداع : هى الوحيدة اللى يقدر اى حد يفهمها من غير ما يتعلمها أو ياخد كورسات فيها .. أنت لو هتسافر الصين بتبقى محتاج تتعلم لغتها و هتلاقي صعوبة شديدة في كده .. أو يكون معاك مترجم و ده بيحصل في اى دولة لغتها غريبة عليك .. لكن اذا سمعت مقطوعة موسيقية لفنان الماني مثلا .. مش محتاج تتعلم اللغة الالمانية علشان تترجمها .. انت هتفهم وهتحس بجمال السمفونية و هتعيش جواها .. وكمان لو فنان تشكيلي ابدع في رسم لوحة .. لما تقف تتفرج عليها مش محتاج حد يترجمهالك .. هتخطفك وتدخل جوه العالم اللى قدر الفنان يصنعه و اذا كاتب عمل سيناريو عبقري .. و جه الممثل بعدها و عكس السيناريو المكتوب بحالة درامية ابداعية عالمية .. هيحصل معاك نفس الكلام .. وكل ما كان الفنان فاهم .. كل ما هيحصل ليك عملية تواصل و انجذاب ليه .. ودى اللى اى Graphic designer محتاج يوصلها و يتفنن فيها . من خلال الفكرة السهلة الممتنعة من غير فلسفة و التصعيب على المتلقي زي ما بنشوف في الحملات الإعلانية الناجحة و قد ايه بتعلم مع الناس و عمرهم ما بينسوها .
التقليدية تقتل الإبداع : قمة إبداع اى مطعم إن الشيف بيطلع جودة الإكل كل مرة هى هى .. وده اللى هيخليك ديماً تروحله علشان المستوي مش بينزل ، لكن في مجال الجرافيك الموضوع مختلف تماماً .. لازم كل مرة تبتكر فكرة و حالة جديدة علشان تتواجد في السباق الفني اللى موجود تخيل لو طعم و شكل الفاكهة واحد الناس هتمل منها ، وده معناه انك محتاج تدور ديما وتجرب أسلوب جديد لنفسك و متزاحمش وتبقى copy&paste من حد لان ده هيكون أكبر سبب للفشل و عدم الاستمرارية
3 - الجانب النفسي المجال الإبداعي .. نوعين أول نوع .. صانع الإبداع .. اللى بيعمل الحاجة من الصفر .. اللى هي صفحة بيضا ويبتدى هو يملاها بإبداعاته الجديدة و المتبكرة .. زى مثلا الموسيقار لما يسمع صوت العصافير في الطبيعة و توحي له بمقطوعة موسيقة ويبتدى يكتب النوت الموسيقية أو الـ Graphic designer اللى بيبتدى من صفحة بيضا و يوجد حلول بفكرة جديدة لمنتج محتاج الترويج له ، أو الكاتب و المؤلف .. الى بيخليك تدخل جوه عالمه الخاص بإبداعته الكتابية وفي النوع التاني : المؤدي الجيد .. زى العازف اللى بتجيله النوت الموسيقية مكتوبة جاهزة ويبتدى هو يبدع فى الاداء التنفيذى ليها .. أو الـ Graphic designer بينفذ الـ Designer من غير ما يبتكر أى فكرة .. سؤال ؟ لو حصلت مشكلة وضغط نفسي مثلا من ظروف الحياة لـ واحد شغال محاسب مثلا بعيد تماما عن الفن و صانع الإبداع و المؤدي للإبداع .. تدريجياً مين هيتأثر اكتر واحد هيتأثر هو صانع الإبداع و يليه المؤدي الأبداعي و بعده المحاسب اللى يكاد يكون التأثر معاه
