يمكن عندكن اضطراب بالمزاج اسمه #الاكتئاب_الموسمي ، بيصير كل سنة بنفس الوقت، أشيع عند الإناث ،وبيبلش غالباً بالخريف وممكن بالشتاء .
شو السبب ؟ سبب واضح غير معروف لحد الآن ، لكن إحدى النظريات بتقول أنه قلة ضوء الشمس بالخريف والشتاء تجعل الدماغ يفرز #سيروتونين بشكل أقل وهاد الناقل العصبي هوي المسؤول عن تنظيم المزاج .
شو الأعراض يلي بيعاني منها الشخص ؟ بتتراوح شدة الأعراض من انزعاج خفيف لتعطل عن العمل وتأثر العلاقات الاجتماعية ، بتتضمن :
قلة طاقة وتعب (قومي اعمليلنا قهوة ب هيل، بدني حاطط ومالي حيل ).
زيادة الشهية ( جبلي شوكولا ليروح حزني، ولا تسألني عن وزني ).
النوم الزائد ( نام كتير وكول كتير، وشوف كرشك كيف بيصير ).
الرغبة بالانعزال والوحدة ( لحالي أحلالي ).
شو العلاج ؟ لازم تراجعوا طبيب نفسي ليعطيكن الدواء المناسب ويلي هوي غالباً من زمرة مضادات الاكتئاب أو علاج آخر حسب الحالة.
شو الوقاية حتى مايجينا هالاكتئاب الموسمي ؟
تطلعوا كل يوم برا البيت شوي حتى لو الدنيي مغيمة بيكون في استفادة لا بأس بها .
تلعبوا رياضة ٣٠ د باليوم .
حمية غذائية معتدلة فيها بروتينات وألياف بحيث تشعركن بالشبع وماتخليكن تشتهوا الأخضر واليابس .
حاولوا تعملوا هالشغلات وتعبوا وقتكن وتقعدوا برفقة ناس إيجابيين ليمضوا هالفصلين على خير ، أما يلي بينبسطوا بقدوم الخريف والشتاء هنيئاً لكم .