أول شي خلي نتعرف شنو يعني #موازي ؟ الموازي او القبول الخاص هو أنه تشتري درجات من الدولة !! اي نعم تشتري درجات من الدولة بفلوسك .
عبدالله شلون يعني اشتري فهمني ؟
#اسمع :-
- مثلاً انت معدلك او 96 او 97 وانت حلمك كلية طب ، لكن هذا معدل ما يأهلك أنك تدخل طب !! فشلون بهيج حالة ؟ ماكو حل احصل بي طب ؟
لا اكو حل ، الحل انك تشتري 3 درجات وتضيفهم على معدلك ويصير 98 او 99 وتدخل طب !!
• زين عبدالله شلون ومنين اشتريهم ؟
- تشتريهم من الدولة ، لان حتنزل استمارة خاصة بالتقديم على الدراسة الموازية يسمونها ( قناة القبول الخاص) هاي الاستمارة من تقدم بيها هو تلقائياً يضيفلك درجات الموازي على معدلك.
زين سؤال إكدر اشتري كم درجة ؟ لو مو محدود ؟
- لا قلبي محدود عدد الدرجات الي تشتريهم حسب الكلية ، وحتى تفهم اكثر حنطيك كل كلية وشكد الحد الأقصى الي مسموحلك تشتري بي درجات :-
- المجموعة الطبية والمعاهد الطبية وكلية التمريض والكليات التقنية الطبية :- ينطوك 3 درجات على معدلك.
فإذا قدمت بالاستمارة ( استمارة الموازي خاصة ) على كلية من كليات المجموعة الطبية ومعدلك 95 فتلقائياً يصير معدلك 98. خوش ؟
- الهندسة ينطوك 4 درجات على معدلك. - العلوم ينطوك 5 درجات على معدلك. - باقي الكليات والمعاهد ينطوك 6 درجات على معدلك.
هاي إضافة الموازي لآخر سنتين
اما قبل 2019 فالاضافة كانت درجتين فقط للمجموعة الطبية وثلاثة هندسة و أربعة علوم و خمسة باقي الكليات والمعاهد ...
#ملحق_الاسئلة
• اذا اني محتاج درجة فقط يصير اشتري بس درجة لو الا كلهم ؟
- لا الا كلهم تشتري .
• الدفع يكون سنوي لو دفعة واحدة ؟
- يكون سنوي ، يعني كل سنة تدفع الاقساط وعلى شكل دفعات مو مرة وحدة.
• دوامي يكون صباحي لو مسائي ؟
- دوامك يكون حالك حال الصباحي وتداوم معاهم بالكليات الحكومية ونفس الحقوق انت وهم لكن الفرق انك تدفع فلوس كل سنة ، وهم مجاني .
• من ناحية #التعيين ؟ - حالهم حال جماعة الصباحي حكومي.
• من ناحية قوة الشهادة ؟ - شهادة الصباحي والموازي نفس الشي.
#ملاحظة :- جميع الكليات والمعاهد بيهم دراسة موازي الا معهد النفط لأنه تابع لوزارة النفط مو وزارة التعليم العالي . منقول
