مسدج من كلاس مالهاش علاقة بالدراسة بقالي كتير حبتين مانزل | الدفعة 38 المجموعة "2" (دفعة روان عبدالحميد)
مسدج من كلاس مالهاش علاقة بالدراسة
بقالي كتير حبتين مانزلتش المسدج دى
اول حاجة عاوز اقولها .. انى عاوز اشكر كل الناس اللى ساعدو معايا طول التيرم .. فيه ناس فعلا عملو مجهود عظيم جدا و تعبو كتير و واجب عليا اشكرهم و ارفعلهم القبعة إحتراما ليهم .. الناس دول بيعملو الحاجة و هم حابينها لدرجة انى بلاقيهم من نفسهم بيبعتو الحاجة جاهزة من غير ماطلب منهم او اقوللهم يعملو الحاجة دى .. ربنا يكرمكم فى حياتكم و يوفقكم ويسهلها عليكم زى اما بتسهلوها على زمايلكم
تانى حاجة .. التيرم كان تقيل جامد المرة دى .. بص يبني انا كل تيرم بقوللك الجملة دى والمضحك ان كل مرة بيبقى ترو فعلا مش ترول و كدا فانت اتعود بقى خلاص هانت باقى سنة و تتخرج
فاضل تكة بسيطة فى التيرم .. و هو دا اللى هنعوض فيه فعلا .. عارف انك تعبت و جبت اخرك و انطفيت .. بس انت مجرب قبل كدا و عارف ان كل دا بيعدي .. فانا عاوزك تهون على نفسك ان كل دا هايعدي .. اضغط على نفسك الشهر دا وماتقلقش كل مر سيمر .. هتلحق تلم ماتقلقش .. انا بكتب المسدج دى وانا موقع مني كميات من المنهج اد كداهو ومنطفي .. فانت مش لوحدك يا فواز بس فيه امل والله .. ماتخافش يعم هاتعرف تعمل ريمونتادا و هتعوض .. ماتسيبش نفسك لانطفاءك و ابدأ ركز و صحصح عشان الشهر دا فيه خلاصة التيرم .. وانت ادها يا كبير
الحمدلله احنا قدرنا نجمع كل داتا التيرم زى كل مرة .. وطبعا دا كان بمساعدتك معايا قابلتنا مشاكل كتير سواء عصافير او انقسام الدفعة ل3 مجموعات اللى خلى يحصل عجز فى معظم التيمات وطبعا المجهود بقى اكبر .. لكن الحمدلله قدرنا نساعد بعضنا و نوفر كل حاجة
حاولت على اد اما اقدر ان تكون ردودي دايما سريعة على كل الناس وماتأخرش على حد فى اى طلب طول ما الحاجة بإيدي .. فانا اسف لو غفلت فى اى وقت لو اتأخرت عليك او كنت منتظر مني حاجة وانا ماقدرتش اساعد معاك .. التيرم كان تقيل و موضوع ال3 مجموعات دا عمل لي لغبطة كتيرة .. بمعنى ممكن تطلب مني داتا اوبس تلاقيني ببعتلك داتا نفرو عادى وحصلت كتير فانا اسف لو حصل مني اى اخطاء
بالنسبة للفترة الجاية .. انا هنزل النهاردة ملف الاسئلة زى كل تيرم .. و هتلاحظو تطور جميل فى التنسيق و اى حد معاه سورس اسئلة او بيعمل اى تلخيصات او شرح يبعتلي علطول مايترددش و هنزلهم .. زمايلك بيحتاجو جدا الحاجات دى و بتساعدهم فا متتأخرش ابدا عن مساعدة زمايلك و لو فيه اى حاجة ناقصاك فى اى داتا ابعتلي علطول ماتترددش .. و طول ما الحاجة بإيدي انا مش هتأخر ان شاء الله .. و ربنا يعيننا الفترة الجاية و يسهل علينا
ختام للمسدج .. فورم الفيدباك اتوصى بقى عشان انا منطفي ياخويا والله
https://forms.office.com/Pages/ResponsePage.aspx?id=KoAvDL1-IkeIViZG0hJ2nGLdG5KA_BdPrPL6QpVu5mJUNVYyTjZGN1NWMTJYOUJBOTFUTzhLOElZSS4u
