2022-08-05 23:04:39
أعتذر منكم طاحت الرّايه
روحي من طلعت طلعت اوياها آخر احچَايه
ويه النهر تتفايض اجروحي
او لهل المخيم شايله روحي آخر احچَايه
ـــــــــــ
أبدي اِعْتذاري او چِلْمتي الأوله
للّي ركضلي او منحني طوله
إيده اِعْله خاصرته او غده ايْنادي:
عبّاس عنّي اتروح معقوله ؟
گتله اعتذِر ما صحِت يا مولاي
ياخَيْ صحتلك أعتذِر من هاي
أعتذر شوَّفت العِده ادموعك
وحدَك توِن و أهل الشِّماته اِهْواي
اتصيح و الشَّامت يسمع اِصْياحَك
يصعب اعليَّه ترجع لزينب لازم اِصْفَاحَك
رِد و آنه خلني اِعْله الثره امخضّب
او بلّغ سلامي او وصِّل لزينب آخر احچَايه
ـــــــــــ
ثانيِ اِحْچَايه الأرْد أوِصِّلها
للّي الشَّمس ما شاهِدَت ظِلها
چَان الله رايد كافل لزينب
دگّيت صدري او صرِت كافلها
أعتذِر أمْس آنه احْرَسِت حدِّچ
او باچَر تِحِرْسِين الخِيَم وحدِچ
ياللي اِعْله زندي شادّه المَعْصَب
باچَر يشدّون ابحبل زندِچْ
چِنتي بعْـيـوني يختي عذريني
و السهم تالي ماخذ امچَاِنچ من غفه ابعيني
عينچِ طِفت من عيني طفّاها
او طاحت اچفوفي او طاحت اوياها آخر احچَايه
ـــــــــــ
أمّا إِعتذاري الثالث امچَانه
للّي اسمعتها اتصيح عطشانه !
اسكينه بعدها تنتظر جُودي
او بعده الرّضيع اِيْلوچ بلسانه
والله لجيب الماي بوْريدي
لاچن اشبيدي و اِگْطَعَوْا إيدي
معروف صيَّاد الزِلم سيفي
غدروني واسْتَسْبَع عَلَيْ صيدي
شابگ الجِربه لآخر أنفاسي
و النذل طبعه امن الگفه يهْجِم وانهشَم راسي
ضرْب العَمد طيّحني من مُهري
او مثل السهَّام انكِسْرَت ابصدري آخر احچَايه
ـــــــــــ
رابع هظيمه لرابع اليمَّه
للمنهدم حيله على عمَّه
يا زين اِلِعْباد اعتذر منَّك
جسمي التِدِفْنه ايتَعْـبَـك ابلمَّه
يمِّ النهـر دوِّرني تلگاني
بس أعتقِد ما تلگه ذِرعاني
عالماي ماي او طشِّروْا جسمي
ترفع كتر يوگع كتر ثاني
ابدفْنتي أدري يندفِن صبَرك
مثْل أبوك إنته بس تشاهدني ينكسر ظهرك
لِمْ جسمي الِموذّر من الصَّحره
او ويّاي لفِّ ابرايتي الخضره آخر احچَايه
ـــــــــــ
روحي اطْلَعَت بس باقِيه اللّچْماتْ
او ويَّاها طِلْعَت خامِس الچِلْماتْ
للما تبات الإ على امتوني
او من عگب حضني بالخرابه اِتباتْ
رقيّه يا مدلولةْ العيله
هالليه يا مصعبها هالليله
چنتي عِزيزه ابشارب العبّاس
الطير اليمر اِعليچ يا ويله
لاچَن ابموتي اختِلْفَتِ الحاله
او من عگب عمّچ يا وسف ظعنچ شمر يبراله
اتْعِتبين و آنه ميِّت اْو أسْمَع
اْو منِّچْ على نحْر الأبو تطلع آخر احچَايه
ــــــــ
هاذا اعتذاري لهْل الِمْخيَّم
و ابگلبي لي هسَّه الحَچِي ما تَمْ
احچَايات خمسه احْچَيتهن لاچَن
ابسادس احچَايه روحي تتلعثَم
لرض المدينه اتسافر أحزاني
للواگفه اِعْله الباب و اتّاني
گلب العليله ما گطع ظنّه
و اتگول حاشه عمِّي ينساني
چَان امَل عِدها تلتحق بينه
الجاي و الرايح گامت اتنشده عمِّي چَا وينه
خلها تأيِّس ما نرد ليها
منها اعتذر و أدري تبچّيها آخر اِحْچَايه
ــــــــ
منِّ العليله اروْيحتي تِطلَع
لدار أمِّي أگصد گبل لا أرجَع
نفَّذِت أمرِچْ بس إِعذريني
إِنْ چَان ردتي أكثر اتگطّع
أصَالة ًيُمَّه عنِ اِلساني
نيابة ًأحچِي عن اخواني
بالطف بذلنه غاية المجهودْ
يشهد علينه القاصي و الدَّاني
چِنّه لِعْـضيدي ارماحه و اِدْروعه
او ظلّت ايميني لازمِه الرّايه و اِهْيه مگطوعه
او لمّن جِعَل راسي وسط حِجره
شِلته او گلت فشله من الزّهره آخر اِحْچَايه
ــــــــ
الچِلمه الأخيره و الأهَم عندي
إلى ابْنَ أخويه الحجَّةِ المهدي
موعود أنا اتشيل العلَم عگبي
او لليوم باقي أنتظِر وعَدي
اتبدَّن مع الجُود اعتذاراتي
او منَّك أريد اليوم ثاراتي
أنا أدري مهما طالت الغيبه
[ فإنَّ يوَمَ المنتقِم آتِي ]
الرايه عالشاطي يمته ترفعها
ترجع ابثارك و السلب عمتك إيده تگطعها
عيني اعْله سيفك يا بعد عمّك
كلها حچَت لاچَن بقت يمَّك آخر اِحْچَايه
ـــــ
ميرزا عادل أشكناني
ذو الحجة ١٤٤٣
https://t.me/mirza_adel_ashkanani
3.1K viewsعادل .., 20:04
م
