) لو انت مش منهم ما تكملش قراية لأن الفقرة دي ممكن تلغبطك ... | محمد ماهر - للصف الثالث الثانوي

) لو انت مش منهم ما تكملش قراية لأن الفقرة دي ممكن تلغبطك ... المهم أنا بحترم العقليات دي دماغتهم حلوة وبيفكروا بس هنا اتسرعوا ... وممكن يقنعوك بكلامهم انها المفروض (يرجُن) ... ويقولوا مش نون النسوة بتخلي الحرف الاخير ساكن ... وهي هتيجي وراه يعني المفروض نحذف الواو في (يرجو) لمنع التقاء ساكنين لان نون النسوة ساكنة بردو ... وهنا الغلطة ... نون النسوة مش ساكنة ... نون النسوة عليها فتحة فبالتالي ما فيش أي مشكلة ... بس عشان كدة مش بنحذف الواو.

7- (الرجال يسعون في المعروف)
أنث الجملة.
ج: (النساء يسعين في المعروف.)
ببساطة لما نجرد الفعل هيبقي (يسعى) ... فلما نضيف نون النسوة هيبقي (يسعين).
و(يسعين) على وزن (يفعلن) أما (يسعون) على وزن (يفعون)
كدة نون النسوة خلصت اتدربوا عليها كتير ضيفها لأي حاجة وكل حاجة.

توكيد الفعل بنون التوكيد
هنتكلم عن الدرس ده في حدود المنهج بس وهتلاقوه درس سهل جدا وفكرته بسيطة على فكرة.
نون التوكيد هي نون مشددة ... ما بتتصلش إلا بالفعل المضارع والأمر وبتبنيهم ع الفتح.
قبل ما نبدأ بأمثلتنا لازما أفكرك بالأساسيات اللي قلناها قبل كدة:
1- أي حرفين زي بعض الاول ساكن والتاني متحرك ... بيحصل لهم ادغام ... يعني بيبقوا عرف واحد مشدد وبالتالي أي حرف مشدد أصله حرفين الاول ساكن والتاني متحرك.
2- ان ما ينفعش حرفين ساكنين ييجوا ورا بعض.

نبدأ الامثلة بقي:
1- (لتذاكر الدرس.)
أكد الفعل بالنون

ج: لتذاكرَنّ الدرسَ.
ضفنا نون توكيد مش أكتر

- (قل الحق.)
أكد الفعل بالنون.
ج: (قولن الحق.)
نجرد الفعل ونخليه في صورته الأصلية هيبقى (قول) ... لما نضيف نون التوكيد هيبقى الفعل مبني على الفتح فتبقى اللام مفتوحة يعني (قوْلَ + نَّ) ما فيش أي مشاكل فننزلها زي ما هي (قولن).

الغلطة بتاعة المعظم إنه بيسرح ويقول (والله لتقولن الحق) ودا غلط ... لأن (تقولن) فعل مضارع أما (قل) فعل أمر ... فبعد التوكيد بالنون لازم يفضل فعل أمر زي ما هو.

وممكن نقول الشرح بطريقة تانية وهي:
فعل (قل) مبني على السكون ... وكنا حذفنا الواو في (يقول) منعا لالتقاء ساكنين صح؟ تمام ... لما ضفنا نون التوكيد بقى الفعل مبني ع الفتح مش السكون يعني خلاص ما فيش ساكنين؟ ااااه  نرجع الواو اللي حذفناها بقى . تبقي (قولن) ... ضفنا نون التوكيد ورجعنا الواو.

3- (صن الحق.)
أكد الفعل بالنون.

ج: (صونَنّ الحق.)
نفس النظام (صن) كانت مبنية ع السكون ... لما بنيناها ع الفتح باتصالها بنون التوكيد رجعنا الواو اللي في (يصون) ... المهم دلوقتي عندنا نونين ...نون في الفعل (يصون) ونون التوكيد ... هيحصل لهم ادغام ويبقوا حرف واحد؟ لأ ... ليه؟ عشان النون الاولي في فعل (يصون) عليها فتحة ... ونون التوكيد مشددة ... يبقي مش هيحصل حاجة وهيبقي فيه نونين (صونَنّ).
نفس النظام (كن) هتبقي (كونَنّ) ... (عم) هتبقي (عومن).

4- (اتق الله.)
أكد الفعل بالنون.

ج: (اتقينّ الله.)
الفعل كان مبني على حذف حرف العلة ولما اتصل بنون التوكيد بقى مبني ع الفتح ... يعني حرف العة يرجع تاني بقى صح؟ اااه مافيش حاجة تخلينا نحذفه ... يبقي هنرجع حرف العلة (الياء) ونضيف نون التوكيد فتبقي (اتقيَنّ).

الخلاصة إن اي حرف علة سواء كان في الاخر أو ما قبل الاخر بيرجع تاني لما نضيف نون التوكيد ... اعرف دي وريح دماغك من اللي فات ده كله بس خليك فاهمه لأن مهارات زي دي هتفيدك وهتخليك واثق من نفسك لو شكيت في نفسك او أي حاجة زي كدة ... وإنك تكون ماشي على قواعد أحسن تكون ماشي على إحساس وتغلط وعموما الدرس خلص بالتوفيق ^^.