أمير الموت الاحمر .. عريس الطف تِحضَّر عَليه اينـادي الاكبر .. | الشاعر حاتم صبري الكاظمي

أمير الموت الاحمر .. عريس الطف تِحضَّر
عَليه اينـادي الاكبر .. هلا يبن العم
يجاسم صوته ردد .. نـزال المعركه اشْـتَد
هلا بريـحة محمـد .. هلا يبن العَم
____
شايل بيـرغك يـمي
فارس ضيغمي و نشْمِي
حـي الله أبـن عـمّي .. علي الاكبر

شِد الخضره فوگ الراس
خليها تصيح الناس
حيدر هذه لو عباس .. علي الاكبر

ســويها فـصـول الدم .. بسيفك أربعـه
(ما أدراكَ) صاحو ( ما .. يوم الواقــعـه )

بنِزال اشتَد وطيسه .. علي عزمك أقـيسه
صگر هَـد عالفريسه .. هلا يبن العَم
يـَمملوح الخــويّــه .. إلك نُص مـن أُمـيّـه
ويظل نُصهم عليـه ..  هلا يبن العَم
___
حيْ ابنْ الي ما رَد ضيف
جاسم يا أمير السيف
عندك لـ الحـرب تكــليف .. أبو غِـيره

بسـيفك عَگِّـرلها الخــيل
عيِّش كربله الـ يا ويل
يا حيل اعله ظهر الحيل .. أبو غِـيره

بســم الله يـا جــاسـم .. زلــزل بالحَـــرَس
سيفك صاح من تهجم .. (أش) ماكو نَفَس

الحسن صاح الّي شافك .. تره العسكر يخافَك
الحرب صــارت زفــافك .. هلا يبن العَم
أطــشــلَك واهـِـلـِـيّــه .. الرؤوس الخيـبـريّــه
تِحــشِــملــك رقــيـــه ..  هلا يبن العَم
__
صاحو بالحرب إنـذار
خوفـاً شنهو يا سـتار؟
طب لـ المعركه الكرار .. هذه إنتـه

من تتــولّه عــدواني
بظهرك خويه تلگــاني
الاكبر لو هِجَمْت أني .. هذه إنتــه

غِيـــم و تمــطر بنيـــران .. تنزل عالوغـه
الحومه بس لِمَـع سيفك .. صارت فارغـه

صُراخ الحومه عارِم ... يـهَشّام الجماجم
يحي فخـر الهواشم ... هلا يبن العَم
إذا نـــنـزِل ثـنــائـي ... يلاكبـــر ذا ندائي
حُـسيـــني كربـلائي ... هلا يبن العَم
____
شرايك يبن عمّي اليوم
انْسِدها كربله أعله الگوم
سيفــك ما يعرف النوم .. عله سيفي

چــفك حـار مــو بـــارد
منّــه ما سِلم شــارد
يوگــع لو شِــرد واحــد .. عله سيفي

يا جاسـم إذا ننــزل .. و برأيـي أَنَــه
خلّي المَيسَرَه عندك .. و آنه الميمـنه

الحرب نِعگِدها صوبين ... و نِـگُر بالمعركه العين
و نِفَرِّح گــلب الحسين ... هلا يبن العَم
يجاسم تِربي عــيــنه ... عله الله و بس عـلينه
يبــو الروح الحنيــنه ...  هلا يبن العَـم

الشاعر حاتم صبري الكاظمي