2022-07-25 04:34:26
راح الحـيل من بــعــد الاخو راح
طاح الچان ظــهرك عالنهــر طاح
و الفرگه بِدَت ... و الخوّه انتهت
________
اهلال فــوگ الگــاع چنّـك
الچــان كـلـشي راح عنّــك
شلون تمشي وراح يحسين
الـ إنتــه منّه و هوه مــنّك
بدقــايق عالنهر ... هـواي اتغيرِت
مو عباس أظن ... إنته الي متِـت
ساكــت كلــشـي بيك اتسولف العيـن
حسـين اعله الخـيم راجِـع بلا حسين
دمعاتك حِچَت ... و الخوّه انـتهَت
_______
الراح أخو شـيفــيد عمره
كَســرت العــبــاس كسره
من النهر حَد گلب زينــب
شــط الجــروح شــيعبره
شماته بدمعـتك ... يضحكون العده
يصيحون بفَرَح ... (ظــل لـ وَحَــدَه)
انداريت و گلتله بخنگت انفاس
بـخـوك اتشَمـتو تِسمَـع يـ عباس
معقوله سِكَت ... و الخوّه انتهَت
______
مُــنهَك امن الفـرگه تنحَبْ
الهوه يوگعـك بيك لو هَبْ
تگول : من تــسألني عنــه
شلون اگلــها مات زيــنـب
تصـيح بيا جرح ... أبــدي بيا حچي
لو حـته اسكتت ... يفضحني البچي
شسولف يا جرح يا گـلبي شتشوف
أبــدي بـ السـهــم لو گَطــع الچفوف
روحك شَيِبَتْ ... و الخوّه انـتهَتْ
_____
إعتـذار اجــروحــك اتكـِت
مـرّه تبـچي و مـرّه تسكِت
شـلـون تحــچـيها لـ رقيــّه :
عــمــچ العــبــاس مَــيِّــت
الـ يلــوليچ أمِس ... يرجع مو سهِـل
رقيــه مــا يـجي ... راح ابو الفضِـل
رُوحه اعله الخيم يم گلبچ اتدور
خَل يــرتــاح عَــمْ گلــيله مـعذور
عِشرتنه گضَت ... و الخوّه انتـهَت
______
وَگــعـَـت العــبــاس هــيّــه
حَــبـل يعــني بچف رقــيّه
و طيحــتك يحسـين يعني
زيــنــب أخــذوها ســبيــه
بعد كلشي انتهى ... تطيح و تنذبح
يمَن شــالَك نبـي ... يشيلوك برمِح
لـ زيــنب عالرمــح تدعي بكـلمتــين
اسم الله اعليچ خويه من الدواوين
تگلك مِنْ مِشَت ... و الخوّه انتهَت
راح الحـيل من بــعــد الاخو راح
الشاعر حاتم صبري الكاظمي
.
1.3K views01:34
ا
