دخيلك ماكو واحد بالبشر غيرك الموت ابكبره ما غَير تعابيرك دخيلك | الشاعر مصطفى البديري

دخيلك ماكو واحد بالبشر غيرك
الموت ابكبره ما غَير تعابيرك
دخيلك محد ابكدك
موتك خاف من عندك
يبو الحسنين
ا********************
طلع من بيته دستور البساله
مو موته أجا هوه المشاله
مشه وما حاط بس الله اعله باله
ومات وما ترك لفظ الجلاله
شايل مبدأ وصاحب دلاله
دخيلك حته موتك بي رساله

دخيل اجفوفك العل دُعا معتاده
ودخيل الما بچن الا اعله سجاده
دخيل القوه البزندك
ا**********************
عشت شايل نفِس كلش ابيه
ما موجوده عد كل البريه
محد قبلك ابهاي القضيه
بشر وتخاف من عنده المنيه
شواصل مرحله حامي الحميه
ويشتاگون اله ربه ونبيه

تحسب لحظه لحظه اليوم الملاگه
ألسمه والبيهه للكرار مشتاگه
كلهه تنتظر ردك
ا***************
حضَر روحه من قرب اجلهه
حته الروح حيدر ما بخُلهه
ثگيله ضربته لكن حملهه
ورغم قوتهه بس ما مهتم الهه
الشجاعه بس علِي يُضرب مثلهه
ما تحله الشجاعه بس بهلهه

بذيچ الساعه كلبه ما رجف لحظه
ينزف دمه لكن ما ترك فرضه
محد يكدر ايبعدك
ا********************
صفاتك ياعلي ما حادهن حد
ولا ألهن عدد ونگول تنعد
اول صفه بيهن واحد أحد
وثانيهن حبيب الله ومحمد
أما الثالثه الجندي المؤيد
ورابع صفه الزاهد والمزَهد

التسلسل وي صفاتك تيه احسابه
الذكرهِن ياعلي ما تكفي الكتابه
اللُغه والبيها مو گدك
ا**********************
لازم تنذكر هاي الحقيقه
ليش انشگت ابعهده الوثيقه
علي مثل النهر يمشي ابطريقه
ما زاود بشر من الخليقه
تره الحبك حلال اعلِي شهيقه
واليبغضك عذاب الله صديقه

دخيلك يبو الكلفه ابكل تفاصيلك
وبس لجلك صدگ تنگال الدخيلك
فاز ال لايذ ابسدك
ا********************
الشاعر
مصطفى البديري