#اے_بشــر ....
ای بَشَر عمرووی بیهوده تباه ایلموسن
جرمیله نامهٔ اعمـــالی سیاه ایلموسن
حیدرین حقّینی غصب ایلینه یاور اولوب
اوّل و ثانی و ثالثلری شاه ایلموسن
یخوب انصافین ائوین، سینهٔ وجدانی یاروب
کوهی هم شان و وقار پَرِ کاه ایلموسن
هم آیی ردَ ائلیوب هم گونی انکار ائلدون
ئوزووه قاره داشی مِهریله ماه ایلموسن
یوخدی انکار یولی ایلدیگون معصیته
بوتون اعضالری هر امره گواه ایلموسن
خالقی گوزدن آتوبسان داخی دنیایه گوره
بو فنا دهریده شیطانه نگاه ایلموسن
گرچه ابلیس قازوب چاله که انسانی ییخا
سن رذیلانه همان چاله‌نی چاه ایلموسن
ئولومی، آخرتی، دوزخی یاددان چیخادوب
عالمی چاپماقا سن شال و کلاه ایلموسن
نَقَدَر خط چکیله جرم و جنایتلرووه
گئنه‌ده یانمالیسان بسکه گناه ایلموسن
خواب غفلتدن اویان نامهٔ اعمالووه باخ
توشهٔ آخرتون حسرت و آه ایلموسن
ایتروب دوز یولی جنّتدن اوزاخلاشماقیلا
طیّ ائدوب اَیری یولی دوزخه راه ایلموسن
نه خشوعیله نمازه دایانوبسان دل شب
نه خضوعیله مناجات پگاه ایلموسن
(فیضیا) شکر ائله آللهه علی شیعه‌سی سن
سایهٔ شاه ولایتده پناه ایلموسن
#رحیم_فیضی_اردبیلی
ــــــــ
پیج نوای ملکوتی
@navayeh_malakoti
