فوزية : شرفتونا والله بالزيارة دي لينا زمن امال : المشاغل وال | روايات سحر سمير
فوزية : شرفتونا والله بالزيارة دي لينا زمن امال : المشاغل والعيال ومشاكلهم وخدمة البيت الما بتخلص زينب : اسألي امال دي كل يوم في سيرة الجية ليك الله ما سهلها لينا فوزية : انا زاتي متلومة معاكم لوم شديد لكن اها عاد نسوي شنو ما لقيت لي طريقة اطلع من البيت "مروة بتجي خاشة بالعصير والموية بتختهم على التربيزة الكبيرة وبتجيب تربيزة كبيرة تختها قدامهم وتجيب العصير" اتفضلو امال : كيف ناس امك يا مروة ان شاءالله شديدين مروة : الحمدلله يا خالتو سائلين عنكم والله فوزية : مروة دي قبل كم يوم زاتا حصل ليها اجهاض كانت في المستشفى والله تعبت جاها نزيف امال وزينب : يا ساتر يارب الف سلامة عليك امال : الحمدلله على سلامتك ربنا يعوضكم يارب بري وصال ما كلمتني ولا جابت لي السيرة ما عارفة فوزية بعدم رضى : هي وصال اتحمدنت السلامة لي مروة عشان تكلمك يا امال!! امال : اجي فوزية : النصيحة بتك بقت عايشة في وادي براها لا بتجيني ولا بترفع التلفون دا تسأل عني امال : دا كلام شنو يا فوزية المنك انتي شفتيها مختفية ترفعي التلفون دا تفقديها ما زي بتك هسي اكان عندك بت ما بتفقديها؟! فوزية : هههه دا ما القصد يا امال ردك ما يبقى حار كدي بس انا قلته مروة في مقام اختها ما اهتمت بيها امال : امكن ما عارفة هي مروة ولا انتي كلمتنها ولا لوم ساي بس فوزية : ما كلمناها لكن امس جات مع راجلها وحلفت تنزل تسلم علينا .. زينب : انتي يا فوزية عايزة تبدي مشاكل النسابة ولا شنو ، وقت ما نزلت انتي الكبيرة اطلعي وامسكيها من يدها دي وعيها وقولي ليها الحاصل منك كدا كدا فوزية : ما خلاص "بتعوج خشمها" امال : لا ما خلاص الناس بقو اهل بعد كدا ونحن زاتنا كان جينا للجد ما هدا ولدك قصي يوم واحد ما جا يقول اتونس معاهم ساي مرتو بتجي وتمشي ومرات يوصلها لخشم الباب ما بخش علينا مالنا ما لومناه ولا سمعناه فارغ وقلنا كلام مسيخ... كلهم شباب ما بعرفو الحاجات دي لسه انتي دورك كلميهم ولا شنو يا فوزية.
"بنحنحة وعدم رضى" فوزية : صحي "مروة ساكته تعاين ساي بعيونها وكلامهم ما عجبها" ✎﹏﹏﹏﹏﹏﹏﹏﹏﹏﹏﹏﹏﹏﹏ #جانب_ناس_سهاد
سلاف : صاحبتك دي وينا نامت بره ولا شنو ما جات خاشة تاني وصال : بري كدي اشوفها "بتقوم وسلاف بتقوم وراها" سلاف : هو انتي بتتونسي ونحن منتظرنك يختي سهاد : لا والله "بتضحك" سلاف : ما اها الجواب باين من عنوانو مصطفى : عن اذنكم يا جماعة "بمشي بدخل الصالة" "وصال منتبهة مع كلام سلاف وفي نفس الوقت بتقول ليها صحي ما انسى اديني رقم تلفونك مع كلامها تلفونها بضرب بترد #الووو قصي اها جيت؟! [ لا ما لقيت فرصة ما اتفقته مع بتاع عربية عشان كدا ح يجيكم الهادي ما أأخركم ، تقريبا بكون قرب يصلكم يرجعكم برجع ليك حبيبي بحبك يلا سلام] اها يا سلاف مليني ليه سلاف : اكتبي عندك صفر تسعة.... وصال : تمام حفظتو حعمل ليك جرس " تلفونها بضرب " سجليني "بتعاين جهة سهاد يلا نحن نمشي بعد دا سلاف : كان قعدتو حبة وصال : بالود والله لكن ماف طريقة ابقى بينا تواصل ان شاءالله [سهاد اتقدمت قدامهم بتطلع بعد قالت لي سلاف مع السلامة ما انتظرت تمشي معاهم] سلاف ماشة مع وصال جهة الباب بتقول ليها : سهاد مالا ما حاساها براها وصال : اتزكرت احمد بعد رتبت حاجاتو صراحة ليها حق ماساهل عليها سلاف : العليها كتير يا وصال ربنا يعينها ويعوضها خير يارب ، سمح بنتواصل وابقي عشرة على سهاد ما بوصيك عارفاك ما قصرتي . وصال : في عيوني ما تخافي عليها يلا مع السلامة
" بطلعو بتقفل الباب وبترجع تخش بتلقى مصطفى قاعد على السرير "
بقول ليها: انا فاتحت سهاد في الموضوع ومنتظر ردها للعرس.
على الخير والمحبة نلتقي✎﹏﹏﹏﹏﹏﹏﹏﹏﹏
.
لا شيء نكتبه بدون قصد كل الكلمات نعنيها بدقة إما لأنها تؤذينا أو أن أحداً ما عليه أن يفهم ما نريد قوله.
