يمعوده انطيه الموبايل بس خل يسكت و لتذهب التربيه الايجابيه للجحيم ! يمعوده خليه ع التلفزيون ع الموبايل قابل شكو هاي مو عباس ابن هديل من الصبح لليل ع التلفزيون و شكبره راسه كلشي ما بيه ! شكد حلوه قناه ..... الجنه كلها اغاني و الطفل يظل صافن عليها ! بسرعه بدت تبجي افتحي ماما جابت بيبي حنى تسكت ! كلنا نكول هالكلام و لا استثني منها نفسي بس مو ظلم و اجحاف انه اول ما يبدي يريد يحجي تخليه ع الصامت؟ يعني تنتظريه لحظه لحظه يسولف و يكول ماما و اول ما كال اغو سكتتيه؟ هذا الاسكات للاطفال شنو معناه؟ جاوبيني يتحرك كلتي يتحرك هوايه يحجي كلتي يحجي هوايه يبجي كلتي يبجي هوايه زين هو غير طفل شيسوي مثلا ؟ يحتسي القهوه و يقلب بالجريدة؟ زين هذا الاصرار على إسكات الطفل و بعدين تتخبلين و تدورين اوميكا ٣ علمود يحجي و تفترين بيه بالاطباء و المعاهد و دروس اللغه حتى يحجي ! اي التلفزيون ما يسوي توحد هذا اعترفلك بيه بس يسوي اعراض تشبه التوحد و منها انه الطفل ما راح يجاوبك و لا راح يستجيب لحضنك و لا راح ينطيك نظره الاهتمام و لا راح يحب يلعب و عدواني عدواني عدواني و يكون لنفسه عالم خاص انطوائي بيه لعب و شخصيات مجسده بخياله لا الادهى اللي فرحانه من امهات انه جهالها يسكتون ع التلفزيون و راح تنطلق الأعذار و عندي جهال يقرون و عندي بيت انظفه و عندي عيال بس هذا المخلوق لعد ليش جبتيه اذا ناويه تسكتيه؟ الطفل السليم يلعب و يتحرك و يكسر و يسولف و بلا ملهيه بعد السته أشهر و يحرك ايده و يلعب مكعبات و يصعد درج و ينزل درج مو ينشمر على تلفزيون او ايباد ملخص مفيد تحت ١٨ شهر ممنوع التلفزيون بعد ١٨ شهر إلى ٥ سنوات يشوف تلفزيون بيه محتوى تعليمي عالي مو اغاني مكرره تعزز من عزلته لوحده نسخه منه لكل ام مخليه جهالها على التلفزيون من الصبح لليل بلا رقيب بلا حسيب الله يخليك لا تنطيه الموبايل الله يخليك العبي وياه و العب وياه الله يخليك خليه يشخبط شخابيط و يرسم و علميه الالوان و الأسماء الله يخليك اقريلهم قصه ما عندك وقت ؟ لا تسوين طفل د. سيف سمير البياتي اخصائي طب الاطفال
