2021-07-16 03:44:09
الغوص في التفكير |نيونا الجربوعي
ليلة هادية و سمي داكنه هلبا ، القمر كان مغطيه السحاب تماماً زي ما البرود غطى قلبك ، مكانش شيء قادر يضوي الطريق الطويلة غير ضوء الكاشف الي ف نص الشارع ، زحمة أفكار و بال شارد و جسم تعبان كان رافعني للحوش بعد يوم طويل زي كل يوم ، ف نص الطريق ينوضني من زحمة أفكاري اصطدامي بيك! ، علاش الصُدفة مُصرة إنها تجمعنا في كُل مره نحاول نبعد فاها عليك و نحاول نكُون أقوى ، لميت شتات نفسي و كُنت نبي نمشي بس شديت قميصي!
علاش؟ ، قولي علاش !
عارف إنك تربك في قلبي ، و بما إنك شديته بطريقة متوقعة المفرُوض مكنتش تفاجئت لما لقيتني حظنتك بكُل قوة! ،
بطريقة قادرة تحكي قداش ما عنيت في غيابك!
حظُن يقولك إستاحشتك بكُل مافيا من شوق!
ويشرحلك أن حُبك كبُر في غيابك و متغيرش ،
كُنت نستنى فيك تتكلم و تقول أي شيء!
نستنى فيك تقولي نحبك!
نستنى فيك تقولي هي نرجعو!
لاكن انصدمت بأن إلي شد قميصي فرع شجرة و أن الحظُن مُجرد فكرة إختلقها دماغي من كثر شوقه ليك! ، و أن الصدفة و الليل ماجبوش حاجه غير طيفك في خيالي ...
408 views니오나 | نيّونا, edited 00:44