2022-08-31 21:51:28
نزلة...........بطور الملا عمار الكناني قصيدة (مجنونك )
محبوبي.. لو بالشدد ناديتك
محبوبي.. تحضر الي تمنيتك
محبوبي.. من الزغر سميتك
محبوبي.. محبوبي
……………… ..
انت روحي ودنيتي.. يا حسين وطلبتي.. احچيهه
خادم اترابك اصير.. وانت اليخدمك امير.. ادريهه
خدمتك تاج وفخر.. واليخدمك ما خسر.. تاليهه
فازت الخدمت تره.. عالسراط وبالسره.. تمشيهه
خليهه.. الما لطمت ابعاشورك
خليهه.. الما تعتنيك اتزورك
خليهه.. شنهو العذر منطيتك
محبوبي.. محبوبي
…………
انت للعاشگ ضوه.. واليخدمونك سوه.. تخليهم
هناك تذكر بالاسم.. چف ابو الغيره الشهم.. يرويهم
هناك يم رب السمه.. حسين وامه فاطمه..تحييهم
هلا بخدام الحسين.. عن تعب ذيچ السنين.. اجزيهم
كل دمعه.. واسيتوا بيهه احسيني
كل دمعه.. عالمنذبح تچويني
كل دمعه.. يا شيعي ترفع صيتك
محبوبي.. محبوبي
……………
انت سلطان الگلب.. يا حسين وللمحب.. سلوانه
بمجلسك لو دمعي هل.. عيني باچر ما تضل..حيرانه
هذا قانون العشگ.. ويه عاشورك تدگ..احزانه
ونسمع المقتل نعه.. ويه صوت الفاجعه.. بچانه
يالغالي.. مو حلوه دنيه بدونك
يالغالي.. ما تنحمل وعيونك
يالغالي.. گبل المهد حبيتك
محبوبي.. محبوبي
…………… .....
گلي وشيسوه العمر.. عنك سنينك تمر.. واحلامك
يلي ما عندك حبيب.. حسين بس هوه الطبيب.. آلامك
حسين قرآن الكلام.. يمه رتب كل نظام.. ايامك
ما يعوفك للابد.. وانت ويا عالعهد.. ما دامك
منصوبه.. راية فخر للتالي
منصوبه.. تهتف ينور آمالي
منصوبه.. يل بالگللب خليتك
محبوبي.. محبوبي
…………… ..
حسين حبك منزله.. للنذر عمره وهله.. مكتوبه
منطق وحكمه وعدل.. اليحب لا ما يمل.. محبوبه
والي يحضر تعزيه.. تنمسح كل معصيه.. من اذنوبه
واليشارك بالجواب.. تنحسب ختمة كتاب.. او توبه
نحييهه.. ونلبس ملابس سوده
نحييهه.. وام الحسن موجوده
نحييهه.. طول الدهر تعزيتك
محبوبي.. محبوبي
……………… ..
خادم الحسين
حسام ناجي الحلي
202 viewsMare Me, 18:51