او سر مچاریں سنگتان بیا ات کہ دیوانے کنوں گوں مکہیں ماتی وتن ی | پادآ
او سر مچاریں سنگتان بیا ات کہ دیوانے کنوں گوں مکہیں ماتی وتن یک کول و پیمانے کنوں
میر گل خان نصیر 14 مای 1914 ماں نوشکی بلوچستان چه مات بیت و چش 14 مای ءِ روچ ، بلوچستان ءِ یکے چه نگبهت تریں روچاں زانگ بیت .
میر گل خان نصیر ، بلوچ راج ءِ راجی سرشائر ، سیاسی جهدکار ، پٹ پولکار ، راجدپتر نبیس و جهد کار بیته که وتی سرجمیں زند ءَ گوں زلم و ناروایی مڑ ات و وتی زند ءِ بیست و نه سال ءَ زلم و جور ءِ سیاهیں کئید و بندانی تها گوازینت ، بلے گوں جور و ناروایی همراه نه بوت و زبانی چُپ نه بوت و چش بلوچستان ءِ راجدپتر ءَ نمیران و ابدمانیں نامے بوت . میر گل خان نصیر وتی زمانگ ءَ رند چه میر یوسف عزیز مگسی ءَ دومی بامرد ات که گوں وتی مدامی جهد و سر و سوجاں ، بلوچستان ءِ جاورانی کم و گیش بدل کنئگ ءَ سوبیں بوت . اے دوئیں بامردانی نام ، په اے هاتر که مردم اش مُچ و یکجاه کت و بلوچ دردانی گوئشوک و درمانانی شون دیوک بوت انت ، آهانی جاه ءَ گیشینت . میرگل خان نصیر باز مزن و پر سسا و پر مارشتیں شائرے که بلوچ ءِ دردانی زبان و دردانی علاج ءِ شائر انت و بلوچ انکلاب و زرمبشت ءِ زانتکار و سوهویں بیرکدار ات .
گل خان ءِ زبان ، مردمانی سسا و هیالانی شورینگ و پاد کنئگ ات . مردمانی همت و زانت دیگ ات تاں مردم چه بلوچستان ءَ زلم و زورانسری ءَ گار و ولگوئج کت بکن انت . واجه ءِ زبان ، راستی و مردمانی مهر و وشدلی ءِ زبان ات و وهدے که مردمانی زبان گٹگیر بنت و وهدے که مردمانی هک برگ و لگتمال کنئگ بنت ، په مردماں بید چه جهجنئگ و چست بیگ و زوراکی ءِ دیما گوں بامردی ءَ اوشتگ ، دگه راهے پَشت نکپیت و ادان انت که میر گل خان نصیر مردمان ءَ تپاکی و جهد په وشدیدلیں باریگانی رسگ ءِ سکین دنت :
پادا کہ و تن بن گپت تئی پل و چمن بن گپت تئی کوہ و دمن بن گپت پادا اوگہیں ورنا
گل خان نصیر وتی راج ءِ نیکیں مرادنی بیرکدار ات و مدام بلوچانی وشدلیں مرادانی بیرکدار هست و بیت انت ! واجه ءِ نیکیں یات و نام ، ماں بلوچ راجدپتر و هر بلوچ ءِ دل ءَ نمیران و ابدمان انت !
