2021-12-12 08:59:13
ما بلوچیں ما بلوچیں ما بلوچ!
ما بلوچستان ءِ نوکیں ماه ءُ روچ
تاک تاک انت زندءِ دپتر تئی بلوچ
زیر تپاک ءِ رشتگ ءِ هورئی بدوچ
پرچیا از کاروان پدمنتگ ئی
ظاهرانت پیش کنزگ ءِ مادن چو روچ
همبلاں دوشی مزن بانگواه کتگ
منزل اش گپت انت ءُ آرام انت مروچ
روچ دراتکگ تو اگت وابینگ ئی
شنگ ءُ شانگ انت بارءُ بی فکرئی چه کوچ
کامیابی کارءُ کوشست ءِ برانت
اَنب لوتئی چون ؟ که تو کشتگ کروچ
گو هراتِ پئی مان زرءِ لنج بِبُڈ
لعل لوت ئی سکّگیں کوهاں بہ کوچ
وقت گوازین ئی په واب ءُ غفلت ء
قیمتی جنسء مکن چو سُتکءُ سوچ
روم ءُ شام ءِ حسرت ء چیّا ورئی
روم ءُ شامی اڈ بکن از چانپ ءُ نکوچ
لاغری عذرئی نه انت په تازی ءَ
لاغرئی بهتر بِہ تچ بل عذر ءِ پوچ
گوں بلوچی غیرت ء میان ءَ ببند
میش ءِ چم جهلی مکن پادا چو قوچ
نی ترازیب ایت گُوشگ با پهرءُ شان
دیم ءِ دیوان ءَ که ما هستیں بلوچ
ما بلوچیں ما بلوچیں ما بلوچ
ما بلوچستان ءِ نوکیں ماه ءُ روچ
( مولانا عبداللہ روانبُد پیشنّی)
#بلوچستان_دیمروی_وتواجهی_وتمستری
@Sahabbalochistan
365 views05:59