2020-03-17 19:50:22
قالت:-
لما يقول لي منفسن وزهجان ببقي اتكلم معاه ريكوردات وبقعد اتعاور ليه لحد م يروق وينسي الزعل كلو.
وحدة تانية قالت:-
هو بسافر بعيد مني ومن اولادو فبقي ثابت بتنشن ويزهج كل اسبوع هو صاح غصبا عننا وعنو بس نعمل شنو ف الوضع دا!؟بقيت اسجل ليهو فيديوهات انا واولادي وبس يزهج برسلهم ليه شوية وبروق.
واحدة قالت:-
أخوي لما إختلف مع خطيبتو وإنفصلو بقا كائن أنطوائي ومابحب يطلع ولاحتي ف الحوش م بيقعد طوالي جيت من بيتي قعدت معاهم فترة وبقيت بعمل وسعي عشان اطلعو من الحالة دي ف البداية م كان بستجيب بس شوية شوية رجع احسن من اول.
واحدة بتحكي: -
أنا وحيدة أبوي أمي إتوفت من أنا صغيرة وأبوي دا كل الطلعت بيه من الدنيا دي عشت معاهو كل لحظاتي الحلوة ماحسسني بالفراغ حق الام والاخوان كان ببقي لي أم بالصباح وهو بجهزني للمدرسة وبسرحني وبعمل لي الساندوتش، كان أخو لما اجي ويلعب معاي وبيحضر معاي برامجي المفضلة، كان أخت لما كبرت وماعرفت أواجه الحياة بيجيني وأحكي ليهو كل شي لما كبرت وجا وقت أني إتزوج حالتو إتغيرت لدرجة قربت أخلي العرس وأفضل طول عمري جنبو عدا علي شهر وأنا بعيدة عنو جيت لقيتو متغير شديد وأبدا دا م أبوي البعرفو وقتها الحياة دي ورتني قدر شنو نحن بنكون حلوين ومنورين جنب البنحبهم قررت ماأمش وأخليهو ينطفئ سكنت معاه وخليهم يقولو راجلا قاعد في بيت أبوها أنا أبوي دا عندي بالدنيا
واحد بيحكي:-
أمي من لما إتوفي أبوي الله يرحمو ويغفر ليه بقت في حالة سكون دايما نادرا م تتكلم أو حتي تستجيب لو إتكلمت معاها البيت مسخ لي بدونا خاصة إني الوحيد أخواني ماهنا وكتير بحس بالوحدة ونفسي لو أجي أرقد في حضنا وأشكي بس هي حالا أصعب مني فكرت كتير مالقيت حل غير إني أطلع بيها من الجو الكئيب دا إتشاورت مع أخواني وسفرناها عمرة وبعد جات حسيت إنو الحياة رجعت لي والله
واحد بقول:-
ماح اقول عنها منفسنة بس هي بالجد كدا بتحيرني بنكون حلوين وقاعدين ف امان الله فجأة بتقفل معاها بس هي كدا وانا عايزا كدا فبقيت متعود عليها وبس تنفسن بعمل البيطلع بيدي عشان م اخليها في الحالة دي مرات بسيب الشغل والاقيها ونغير جو احيانا بتصل عليها واونسا واخلق مواضيع من ماف لحد م بقت مابتنفسن كتير
في واحد تاني قال:-
أختي دايما بتشكي مننا هو بصراحة نحن كترناها عليها متخيلين بت واحدة عايشة بين 5أولاد اليوم كلو طالعة ونازلة شغاله هو عادي بس بقت تشمع كل المواضيع البتزعلا فينا ومعاها حق مرة اتفقت مع اخواني نخليها ترتاح بعد طلعت الجامعة نضفنا البيت وكوينا وعملنا عصير وطلبنا غداء وعملنا كيك ماطلع ظابط بس لما شافت الحاجات دي بقت تبكي وتحضن فينا بالصف من يوم شفت الفرحة دي ف عيونا انا من دون باقي اخواني واظبة علي عادة اني اساعدا وم اخليها زعلانة وابقي ليها زي الاخت الكانت بتتمناها
قال:-
هي صحبتي شديد وانا م بقدر اشوفا زعلانة والله فلما تنفسن وتزهج انا مابعرف اطمن لو م طلعتها من المود دا بخلي كل الفي يدي وببقي شغلي الشاغل افرحا احيانا بتصل عليها اونسا ومرات بلاقيها نتونس وتغير جو لحد م تنسي النفسنة واهدأ
الخلاصة يخوانا نحن مالينا غير بعض إحتوو بعض الناس للناس اخوك، اختك،امك،ابوك،خطيبك،حتي البيست داك بنحتاج لبعض النفسنة والزهج والمود العلي طول خربان للاسف الاسيف بقت جزو من واقعنا نسيب مكابرة ونبطل نعمل فيها مافارق معانا لانو بالجد نحن م قدر كدا ،الواحد بحاول يتماسك بس مابقي عندنا طاقة للتماسك، عشان كدا خليكم قريبين من بعض ،ساعدو بعض، ابقو حتة أمان لزول، خلو ليهو مساحة يعرف يرتاح فيها وهو معاكم، كل زول لازم يكون عندو زول بلجأ ليه وبس يبقا معاه يرجع أحسن من أول، زول يحتويك ويطبطب عليك، يخفف عنك،يزكرك تعمل الصاح من الغلط،زول يتذكرك ويدسك بين دعواتو، وأبقو عافية
#نوودين_ملجأكم_الآمن_فأهربو_اليه_يا_بيستات
246 viewsNλħιλ • ﴾ֆ, 16:50
ف
