2021-05-24 23:57:48
- أفهمك شو يعني استعمار و بناء كيان صهيوني ع دولتك ، و شو ٧٣ سنة منه ؟ - زي كل مرة قرّب شوي ! مش لاشي ، عشان الخونة ! - لما ينحط فكر معيّن ، و يتخططله ع ورق ! بيجمعوا افكار و بحاولوا هالفكر يلصقوه ب الواقع ، يعني يخلوه ملموس بين البشر و يقنعوهم فيه ! و هالاشي لازم يصير ب رعاية الاقتصاد و القوة !
- بس ؟ طب و الاعلام ؟
- سفاح انت ، بلشت تلقطها ! الاعلام هو اللي بيدعم الفكرتين بالأول ، عشان اقنع راس المال ، لازم اقنعه بالمردود ، و عشان اقنع القوي ، لازم يكون عندي راس مال !
- طب ماشي بعد هيك ؟
- لقينا اقتصاد ، دولة قوية و فايزة ف حرب عالمية ، بدنا دولة ! اجينا للفكرة الرئيسية ، عشان اجمع كل هالافكار ، من غير شعب ! ما بتصير ! طب شو اكثر اشي ف العادة بوحد الشعب ، ألا و هو الدين ! كيف بدي اجذب الشعب ، بجيب الحاخامات ! و صار إللي صار ! ل حد ١٩٤٨ !
- خلص ؟ قامت يعني هيك ؟
- صفناتك هدول مش عاجباتني ! بدهم يقيموا كيان ! ع دولة ! فيه شعبين ف النص ، الإعلام بيقنع الصهيوني ، إنهم جايين ع أرض فاضية ! و بيقنع الثانيين بالخوف و الرهبة !
و المجازر ..
- كمل !
- المجازر اهم نقطة بدي أوصلها ، عمليات الإبادة !
الك حدا في دير ياسين ؟ ف لفتة ؟ طب إلك حدا استشهد ف نكسة ال ٦٧ ؟ لينا بتقربلك ؟ صبرا و شاتيلا ، جدتك كانت ضمن اللي استشهدوا ؟ عمال انتفاضة الحجارة ، حد منهم عمك ؟ يحيى عياش خالك ؟ إلك حدا ف مخيم جنين ؟ حد استشهدلك ٣ مرات ف غزة ؟ اه مهم بيضلهم خايفين منا حتى و احنا ميتين ! شوف كم جثمان شهيد لساته عندهم ! ..
- ليش حكيتلي كل هاد ؟
- عشان تحس ع دمك ، و تعرف إنه فش مكان محدد لإلهم و شخص معيّن ، و مش ! مدامها مش ف راسي ف انا ب خير ! اللي ف دير ياسين ، م لهمش علاقة ب صبرا و شاتيلا ! و اللي ف صبرا م قالوش ل لينا اطلعي ! اقلك شو حلقة الوصل بينهم ! انه هاد تطهير عرقي ! طب شو حلقة الوصل بينهم و بينك ! فش حلقة وصل ! مدامك مفكر حالك مش رح يجيك الدور ! ..
- طب !!
- خلني اكمل ، ٧٣ سنة و انت بتسمع شهداء و أسرى و جرحى و بيوت مهدمة ! و انت متعوّد ! انت عارف شو يعني تقول ل واحد سويسري ! تعوّدت ع هيك ! هم بدهم يخلوك تقتنع انه عادي ! و صوتك هاد ما يصل للسويسري ! اه و كمان انهم مساكين بدهمش يتوسعوا ! طب قارن بين المستوطنة اللي ع باب قريتك ! قديش عمرك ٤٠ ؟ ٢٠ ؟ ١٠ ؟ قارنها بس بين اخر مرة شفتها و هسا ! لو م اتوسعتش ، تعال تف ب نص وجهي !
- طب هدي هدي !
- .. بهدي أنا ! بس انت تفصلش حالك ! عن كل ذرة تراب ! و تقلي هدّي ! عالأقل فرجيني انك بتحاول تفهم ، و تعرف ، و صدقني لمّا تعرف ، مش ه تضلك صافن ! ..
#دامت_فلسطينكم
24 viewsالأنَيَّيْن , 20:57