اتقالي بالحرف ( لو اتجوزتي ف الدراسه مش هتكملي وهيقعدك من التع | جبر الخواطر
اتقالي بالحرف ( لو اتجوزتي ف الدراسه مش هتكملي وهيقعدك من التعليم)
ايام الامتحانات كنت دايما ازنق نفسي ليله الامتحان فكان يقوم ويعملي ساندوتشات ويقولي ( ذاكري وانجحي متخليش حد يشمت فيكي)
ف وقت الامتحانات كنت لسه حامل ورجعت مره مكنتش قادره اعمل اي حاجه فكرت هيدايق ويقولي انتي هتهملي بيتك و و و ... واسمع كلام ففضلت قلقانه .. بس ال سمعته خلاني يومها احمد ربنا عليه ( عملتي اي فالامتحان كان كويس .. طب متعمليش اكل انا لما اجي اعمل انا وارتاحي )
وحقيقي يومها من فرحتي كنت بحاول اعمل اي حاجه بس مقدرتش للااسف
كل امتحان كنت اول ما اطلع من اللجنه اللاقيه اول حد بيتصل عليا ها عملتي اي!! طمنيني !!حليتي كويس!! تقريبا كان قلقان اكتر مني
لما وصلت لسنه رابعه كنت ولدت ليث وكان ايام الامتحانات كان بيشيل ليث عني هو اه مكنش بياخده طول الوقت بس ع الاقل كان بيحاول يساعدني ع قد ما يقدر
لما جينا لايام النتيجه كنت خايفه اوي وهو بردو عشان هو تعب معايا اكتر مني يعتبر وعديت صافي الحمدلله
يوم التخرج معداش دقيقه الا لما بنتصور سوا وكان فرحان بيا وانا باخد شهادتي فضل واقف يصورني وانا نازله من الاستيدج يصورني وانا واقفه مستنيه اسمي يصورني ..
انا بقول الكلام دا عشان هو فعلا خلا راسي مرفوعه خلاني اخد شهادتي ومقاليش اقعدي بلا تعليم مقاليش اي حاجه تقل من قيمتي فضل جامبي ودعمني وساندني ..
منقول......
