#للشاعر #رحيم #المالكي ليـــش لوحدك من غير جناز وياهو الغسلك | قلَمِے🖌ـ شّےـآعَےـر
#للشاعر #رحيم #المالكي
ليـــش لوحدك من غير جناز
وياهو الغسلك ويغمض العيون
غريب بنص محطة وادم أجناب
وهلك عنك بعيد شلون يدرون
اليموت بنص هلة تتهدل هدال
عليه امه وخواته تطيح الامتون
وأشوفك وحدك وانت الكبل جان
الجبل والساتر بسدك يلوذون
ددليني بجوازك رايد اقراه
واشوف شصارلك بالغربة مسجون
من وحشة الغربة لوحشة الموت
وشربت الوحشتين بفرد ماعون
عليك امك تعاين بلجن تعود
وضعنك ما رجع من دون الضعون
عدمن ودعتهة وجيت ليجاي
وعليك تناشد ال يرحون ويجون
تريدك عون الهة بتالي الشيب
وهسة انت ضعت وتريدلك عون
وحدك تنعي روحك جنك تـــــكول
هلي يامن ضيعوني شلون ينسون
المثلك ما يموت وناسة تنسى
العراقي انت العزيز وتنسي شلون
يل حنت جروحك حنة الفاو
يل مدفي بقميصك حقل مجنون
يل بالهور دمك لسة موجود
ولسة بنهر جاسم بيك يحجون
المثلك ما يضل من غير جناز
النخل يطلع وراك وية اليشيعون
المن جابتك للغربة رجليك
ومتت لا ناعية ولا ناس يبجون
