السلام عليكم ألف باء إنتكاسة = التنازل والتساهل. صدقََا يا | «رفيقتي إلى الجنة» للنساء💚
السلام عليكم
ألف باء إنتكاسة = التنازل والتساهل.
صدقََا يا جماعة والله...
سألوا بنوتة إيه سبب انتكاستك قالت *الجوانتي* كنت بلبسه وملتزمة بيه ومرة قولت انزل من غيره ومن خلع الجوانتي لتقصير الخمار ومن تقصير الخمار لرسمة العيون ومن رسمة العيون لـ ولـ ومن النقاب للخمار ومن الخمار للطرحة ومن الطرحة للتبرج والعياذ بالله!! والسبب كان خلع الجوانتي، وكان الجوانتي أول خطوة من خطوات الشيطان.
أعرف أخت كانت من حاملات القرآن الكريم، وبدأت تقصر نقابها وتوسع فتحة العيون وواحدة واحدة مبقاش نقابها إلا عبارة عن قماشة بتداري فقط وجهها، بعض النظر عن الخدود الـِ باينة والحواجب المرسومة والعيون المزخرفة والدراعات الـِ ثلثها باين.
أخوات كتير اتنازلوا عن مبادئهم وثوابتهم الـِ من خلالها هيختاروا شريك حياتهم، لمجرد إنهم يتخطبوا أو زي مبيقولوا ميفوتهومش قطر الزواج، وفورًا اتقلب حالهم من حال إلى حال...
*يا حبيبة الفؤاد.. *
دينك خط أحمر ومبادئ دينك ثابتة لا تتجزأ .. ديننا مفيهوش فصال، المجتمع هو الـِ يمشي رغمًا أنفه على مبادئ ديني مش أنا الـِ اتنازل عشان خاطر المجتمع
الشيطان بيسعى جاهدًا لتزيين الباطل حق فميغركيش أبدًا وساوسه، ولا يغرك كثرة الباطل من حولك . *اوعي تقولي كل الناس بتعمل ...عشان مش كل الناس درجة واحدة عند خالقها ...الجنة درجات، ودخول الجنة يستاهل مننا تضحية ومجاهدة وتعب..*
يفوتك قطر الزواج أهون عليكِ ألف مرة من انتكاستك في دينك، وكل مصيبة في غير دينك هينة
*فاللهم لا تجعل مصيبتنا في ديننا*
وأخيرًا... اوعي يغرك عبادتك وطاعاتك وتمسكك بمادئك لإنك لولا فضل الله عليكِ كنتِ وقعتي أو ما عرفتي الطريق. اشكري الله على فضله واسأليه الثبات دائمًا وأبدًا...
