مفيش فلوس بتصنع زواج ناجح وأسرة.. واخطف رجلك وروح محاكم الأسرة | Ramzy Abdelaziz - رمزي عبدالعزيز

مفيش فلوس بتصنع زواج ناجح وأسرة.. واخطف رجلك وروح محاكم الأسرة وتابع حالات الطلاق والخلع وتشريد الأطفال..ستتفاجأ إن في كثير من الأحيان، تبعات توفر المال كان سبب في حدوث الطلاق..

اسألوا من أنفقوا الأموال على قاعات الزفاف وتجهيز شقق فاخرة وأحضروا كبار المغنيين والراقصات؟ لماذا تم الطلاق والإنفصال..

لو دخلت مشروع الزواج بنظرة مادية فيها مقارانات بالآخرين وتباهي بالشكل والمنظر والبهرجة أؤكد لك أن زواجك لن يدوم ما دامت المادة تحكمه.. مفيش بيت بيتبني وأساسه الفلوس بيكمل، ومفيش عيال بتتربى ويخرجوا اسوياء نفسيا طالما الفلوس بتتحكم في العلاقات داخل الأسرة الواحدة..

مفيش شخص عينه على فلوس شريك حياته ومادياته هيفهم معنى سكن ومودة ورحمة.. التلاته لا تشتريهم ولا تبنيهم الفلوس.. الفلوس ممكن تكون أداة لإدخال السرور والبهجة واسعاد الآخرين بإنفاقها واستخدامها على الوجه الصحيح.. وهي أيضا أداة شرسة يجب محاربتها حتى لا تتمكن من القلب والروح، فتقطع صلات الأرحام وتؤجج مشاعر الحقد والغيرة والعداوة بين الزوجين..

أطول رحلة في حياتك هي رحلة الزواج، تخيل إن شريكك يكون مادي وبتحكم علاقتك بيه الفلوس.. بالله عليك هل تأمن جواره!؟

بدل ما تسألوا دخلكم كام قبل الزواج؟؟ اسألوا أنفسكم هل أنتم مؤهلين تربويا ونفسياً لتحمل مسؤولية الأسرة، هل تتشاركا نفس الإهتمامات وممكن تكونوا أصحاب؟ اسألوا عن بوصلتكم في الحياة وأهليكم ربوكم على ايه!! خلوكم صرحا مع بعض وصادقين.. الفلوس عمرها ما هتجملكم لبعض ولا الشكل هيفضل عنصر جذب مابينكم.. أول ما بيغلق عليكم بيت واحد.. الجوهر والروح والأخلاق هي اللي بتدوم وتكمل..