في ناس حبيسة الماضي وبيتباكوا على إختيارات خاطئة اتخذوها زمان | Ramzy Abdelaziz - رمزي عبدالعزيز

في ناس حبيسة الماضي وبيتباكوا على إختيارات خاطئة اتخذوها زمان وندمانين وبيجلدوا ذاتهم على مالم يتم تحصيله، مع انه فات ومستحيل يتم تغييره.

وفي ناس خايفه من المستقبل، فقرهم بين عنيهم.. دايما بيتوقعوا الاسوأ.. ونظرتهم محدودة وسلبية ومحتاجين ضمانات مكتوبة.. إنهم لو اجتهدوا وسعوا حتما سيصلوا ومحتاجين يعرفوا الزمان والمكان وبدقة، مترددين وشكاكين. يقولك هو انا لو ذاكرت كذا وخلصت الكورس كذا، اضمن احصل على كذا واسافر لبلد كذا. يابني انت غير ضامن ان التنفس يستمر لدقيقة واحدة من الآن، هل تريد ضمانات لمستقبل ومشاريع. ياحبيبي نحن نسعى وعلى الله النتيجة كما يشاء. روح ياحبيبي راجع ايمانك وادرس باب الرزق.

وفي ناس شاغلة نفسها بالآخر، صديق او زميل او حتى اخ، وصل لإيه!!.. كيف فعل هذا!!..اتجوز في وقت قياسي، من أين له ذلك، مركزين في حياته أكثر من حياتهم، بيقارنوا نفسهم بغيرهم وساجنين نفسهم وامكانياتهم في السباق مع فلان. مع انه والله لو ركزوا في انفسهم واستغلال امكانياتهم اللي ربنا اختصهم وميزهم بيها، هيكونوا في حته تانيه.

وفي ناس اتعلمت من أخطاء واختيارات الماضي بما ينفعهم في الحاضر، ومركزين جدا مع نفسهم وعايشين واقعهم وبيحسنوا من أدائهم اليومي والشهري والسنوي وواضعين اهداف وأولويات لحياتهم بناء على احتياجاتهم وبما يتناسب مع مهاراتهم وامكانياتهم، بيقارنوا حالهم الحالي بزمان من سنتين وتلاته وبيحمدوا ربنا. بيسعدوا بالرحلة كلها بأفراحها واحزانها بأخطائها "مؤمنين" بقضاء الله وقدره فيهم، كل ماعليهم هو السعي والأخذ بأسباب النجاح ومتأكدين وواثقين وكلهم حسن ظن في الله إن طالما تعبوا وأحسنوا العمل، فسيرزقهم بالأفضل دنيا ودين.