عادل: ها سمير عمي أتصلوا له الجماعه ، وعمي قال لهم ، خلاص ٢٥ ألف سعودي ، لأنه أمي كلمت عمي وهو قال تمام
سمير: لمو أنا مش موافق هذو يلفوا ويدوروا، عمر أتصل لي بالنهار وقلت له، مابش نصيب، لمو الرفاس
عادل: عمي قال طالما البنت موافقه خلاص ، مانكسرش فرحتها
سمير: هذو يشتوا من عمي يوفي لهم الشرط، مليون وإلا مليون ونص وأنا ماقلت لعمي لأنه مريض
عادل: هم قالوا كذا عمي مش داري
سمير: هم قالوا وإحنا راجعين من بيت عمي
عادل: أهااا طيب أنا بوصل لعمي هذا الكلام مع السلامه
سمير: أمه يمه
أفراح: هاااا مو بك تصيح
سمير: انت نزلتي تزوري عمي وإلا تقولي له من الشرط
أفراح: أني قلت لعمك ماشنوقف بوجه النصيب قدهي ٢٥ ألف سعودي حل وسط
سمير: أنا متفق أنا وانت من البدايه على ٤ مليون، وهي نفسها بالسعودي، تبيعيني كذا، وتغيري رأيك
أفراح: حتى لو متفقين، الله يستر عليها لو هو نصيبها
سمير: أقسم بالله العظيم طالما غدرتي بي ما تتزوجه ولا حاجه ولو تقول فاتن موافقه والا تشتي تتزوجه أقسم بالله لأذبحها
الكل سكت
شويه وأتصل جهاد
ووقعت غاره وصياح بين سمير وجهاد
وسمير قال والله ماتتزوج ، ومره ثانيه ماشدخل ولا لي فضول عادهن يزخفين ويعملين حركات ، لكن طزززز زواجه مابش هم كذابين
وجهاد: ياأخي أنا قلت لك الطمع مش حلا وبعدا نقطع بالنصيب لمو إبصر أنا لأنه أهل دنيا طماعين كرهتهم ، مانشتي نكون كذا بالمعقول زعم نبيعها
وارتفع أصواتهم سمير بالبيت وجهاد بالتلفون ووووو كلام كثير
الموجع ان تتذكر كل شي دمرك وأسرك بين جدران الهم والحزن من الأقرباء والخذلان الموجع، والموحش وتتدكر تفاصيله، ولا تستطيع إصاغته بالكتابه لكنك بالدموع تقدر
أفراح خرجت لعند البنات مسرعه أعجبكن ذلحين فتنكن بين أخوتكن يا فتنه وانت تتراحمي وتتمسكني وتأشر على فاتن
يسرى: وهي مو دخلها والا إحنا موووو دخلنااااا ، هم يتصايحوا وانت إرجعي فوقنا
أفراح: الله يجعل لكن موته، أهلكتني الله يهلك أرواحكن وخرجت من الغرفه
على مسمع من العيال وأمير بس جالس ساكت ومستحي
وسمير ومحمد محد حرك ساكن يقول ل أفراح لا ، ماتوصل للضرب واصلا مابش حاجه تستدعي الضرب
عم الصمت والهدوء بيت محمد
رائحة المنزل، وصوت الهواء ، وجدران البيت، وأثاثه، وأبوابه، وغطاء سريري ، على وشك إبتلاعي وأفلام الرعب التي أشاهدها أصبحت من أبطالها، أن يبتلعني سمك القرش، أو يطاردني أحد ألأسود في البراري $ خاطرتي
الساعه ١١ مساء
جهاد أتصل: السلام عليكم ، كيف حالك ياقلبي، وين أمي
باسمه: وعليكم السلام ، الحمدلله بخير دامك بخير ياغالي ، أمي دخلت ترقد
جهاد: لمو مابش معاها قات
باسمه: مدري ، عاد لهم نفس تغمض عيونهم ، سمير صوت شخيره لهنا وأمي ، راقده ولا على بالهم شي وضميرهم مرتاح
جهاد: طالما إنه ما وقع نصيب الله كريم ، وسمير قال ما شدخل مره ثانيه، إن شاءالله مره ثانيه ، ما شخلي حد يتدخل
باسمه: شفت طلعوا متفقين أمي وسمير، وسمير يشتي يثبت رجولته إنه مارضيش يزوج خواته ، عناد بس وقال لو تقول فاتن موافقه بيذبحه
جهاد: لاحول ولاقوة الا بالله العلي العظيم مو هذا من خبر ، كنت حاسس إن سمير ينفذ كلام أمي
باسمه: المره الثانيه مدري العاشره ، كونوا قولوا ، مابش معانا بنات للزواجه تمام ، وما تقولوا صلي إستخاره ، وفكري، هكذا ها قولوا لا ، أحسن من المشاكل كل مره وأمي ضربت يسرى
جهاد: ضربتها لمو مله ، آه آه ، سهل إتحملين وإحتسبين الأجر من الله
باسمه: نتحمل لمتى، أصلاً محد ضارب لنا كرت ولا يعملوا لنا قيمه
جهاد: لمو تقولي كذا أشتي أدري
باسمه: لأنه هذا الواقع هذا وسمير داري بالسحر وقلت له قال بس للخرافات ، عمي مالوش دخل عاده يدافع عليهم ، ماوقف معانا زاد خرب وهنجم ، لكن به رب كريم، لكن لذمتهم كلهم من سبب لنا بقطع الحلال والنصيب
جهاد: لاتبكي ولا تحرقي دمك انت ويسرى وفاتن ، الله كريم ما ينسي أحد ، وإن شاءالله شطلع ونعمل حل للسحر هذا
باسمه: أكثر من اللي عملته أني، قد نظفت البيت كله ، بس الظاهر رجع العمل من جديد
