- وحشتيني --وانت كمان وحشتني يا خالد بس مكنش ينفع اقول ، وحشت | 𓄼 Ë𝙻 3𝙰𝙻𝙰𝙼 ..🖤🪐 _ العالم

- وحشتيني
--وانت كمان وحشتني يا خالد بس مكنش ينفع اقول ، وحشتني بس موحشنيش اللي بنا ، تعرف انا دفعت ايه مقابل اني ماجيش اقولك "وحشتني" تعرف كان تمن اني ابان نسيتك ايه ؟!

حياتي يا خالد.. التمن كان حياتي بقيت اخرج مع صحابي وبقيت اقابل عرسان جايين يتجوزوني عشان اتحكالهم عني مميزات كتير ، انا عملت كل حاجه عشان لما اقابلك زي النهاردة ماقولكش وحشتني..

بالمناسبة مامتك عامله ايه ؟ ، لما تشوفها قولها خلاص اللي سحرالك مشيت اتمنى تكون بطلت تشتمني وتقول عليا ماشبهش ، اتمنى يكون فراقك ليا راضيها اتمنى تكون مرتاح مع اللي اختارتهالك ..

انا مبسوطه اني قاعده قدامك متماسكه ومبعيطش ، ومبسوطه انك قاعد قدامي وعيونك كلها شوق وحنين ليا ، ما هو مش معقول ابقى مخذوله وماكنتش بتحب كمان ..

انت كنت بتحبني يا خالد بس معندكش شخصية معرفتش تبقى عايزني ، خُفت من المشاكل وفي صراعات مع اهلك عشاني ، كنت خايف تخسر مساعدتهم ليك ف الجواز ، ما قولتلك شوية خيش وقش وهنعمل بيت وهعيش تحت رجليك ..

اقولك العيب مش على مامتك ، عيب عليك عشان مامتك ماشفتش ازاي كنت تحت رجلك وبحبك ووقفت جمبك وقدرتك ، ماشفتش انا كنت شايفاك ازاي ، بس انت شوفت ومش هقول بعت بس انت محاربتش..

يالا خير سلملي عليها ، وعن اذنك بقى لان في عريس جاي يتقدملي النهاردة كويس وابن حلال ، ادعيلي محسش اني بخونك معاه واسيبه ، انا ماتخطيتكش يا خالد انا بنتصر لكرامتي ومشاعري اللي مرمغتها ف الطين ..عن اذنك سلام.