الشاعر سعد هادي الشمري

2022-08-02 19:43:32 بالطف يسقاي         معجزتك بهاي
بچفوفك اشلون     تكتب على الماي

***

شيب التاريخ، واهله كلهه غيّاب
و الف واربعميت عام وموقفك شاب
كل سنه اتثنّي على المَي تترِس الجود
وتنفض ايدك منّه زُهداً يبن ابو تراب

بچفوفك اشضام     يا وجه الاسلام
لهسه اعله الجروف  عطرك يوفاي

***

على وجه النهر كلمه تثبَت شلون؟
وكلمة "حسين"  اكتبتهه وغِيرتك لون
بهت وجه الدنيه من يومك، واثاريه
الگمر من يعطش ضوه يتغير الكون

سرك شنو ووين     يا كاسر حسين
شما گلنه الخيام     نشوفك نهر جاي

***

چفك انطَش للعَطش عباس دمّه
لهسه الك شاطي النهر مشكول ذمه
الماي ما يدري بشنو ايكفّر اذنوبه
و بقه يفتر عالگبر رادك ترحمه

معجزتك اتكون     بالنهر مدفون
ايگـلّـك بَـلّـيّــاك     شنهو انه معناي

***

الماي من يا باب اله طبيت گلبه
الما نگول اسمك عليه ما يسوه شربه
من يصلي النهر يتوضه بمحبتك
وچفك الفوگ الجرف، محطوط تربه

للـ مَي عبادات    واجروحك ايات
يا كلمة الشوگ    الگالتهه دنياي

***

اقترن يا بدر العشيره الماي واسمك
الراد يرسم نهر يالكافل يرسمك
"الكُلُ شيءٍ حي" جروحك يابو فاضل
حمره راية ثارنه وفكرتهه دمك

اجروحك يعباس     للمبدأ انفاس
بيهه الزمن عاش     وللحق صُفن راي

***
     
سعد هادي الشمري

@saadhadi83 باز کردن / نظر دهید

2022-07-31 15:55:18 #ابوذيات_لشريكة_المصاب
#السلام_على_ام_البنين_الاربعه
.
.



النظر وسط المدينه     ..  واربه عالطف
وكُبر شوفي ابصوّره     ..  واربه عالطيف
الفِكِـر بحسـين هايم     ..  واربعه الطف

نطيته ويرد سالم ردته اليه

***

الگلب ما ربه بفرحه    ..  رابي عالهم
وفصول النوح ولدي   ..  رابع الهم
اتلاثه انطيـت للطف   ..  رابع الهم

الگمر، وحسين سمّاه ظَهر اخيه

***

طيــف حـسيـن بالدمـعـات    ..  صحته
كـل ظنّــي عـدل وبـخـيــر     ..  صحته
بِشِر من جاب موت حسين    ..  صحت آه

مثل صيحته بطيحة چف اخيه



***


سعد هادي الشمري
@saadhadi83 باز کردن / نظر دهید

2022-07-28 16:01:03 اعيون زينب يبو اليمه اشحالهه
وشـافـت النبـلـه بنـظـر كفّـالـهه

***

اعـيـون زيـنـب بالمـدامـع غـارگـه
حگهه غير اعيون اخوهه امفارگه
كـثـر مـا بالعـبـره زيـنـب شاهـگـه

ابـلا زفـيـر الهــوه يتـعـنـالـهه

***

ابنـيّـة الزهــره الزچــيـه اجفونـهه
امجـرّحـه وتــشـبه زراگ امتــونهه
ابچفهه من تمسح الحــره اعيونهه

الجِفن يتجرح وخشنه احبالهه

***

مـن البـواچـي اعـيـون زينـب رايـحه
شـمـس چـنهه وعلى المـغرب طايحه
ضـاع صـوت الحـره گـد ما صايـحـه

على اللي من تمشي چان اخيالهه

***

مـن البواچـي اعيـون زينب غايره
كثـر مـا صـوب الشريـعـه ناظــره
اعيـونـهـه جربـة الكافـل صايــره

دمه وماي اتنگط اعله ارمالهه

***

اعيـونـهه العبـاس كل موضـوعهه
وجرّحـت خـديــن مـن ادموعــهه
ابغـيـر چـفّـه ما توِج اشـمـوعـهـه

الـ خيمه من سيف ورمح سوّالهه

***

اعيون زينـب بچي ومدمع ذابـله
صــوره للـعـبـاس بـيـهـن شـايـله
حتــىٰ مـن اتنـام مـنـهـن نــازلـه

ادموعهه وينبض حزن دلالهه

***

اعيون زينب بالبواچي امغورگات
اگبالهه ذبحـوا ضـواهن عالفــرات
بالخـرابه تگضـي ليلـتـهه وتـبــات

وعين اخوهه اعله الرمح تبرالهه

***

سعد هادي الشمري
@saadhadi83 باز کردن / نظر دهید

2022-07-21 14:25:45 #كل_عين_باكية_يوم_القيامة_
#إلا_عين_بكت_على_مصاب_الحسين

.
.

على امصاب اغفن ويندهچن امصاب
اشيسكّـتچـن وطاري حسين ينجــاب

**

هــا يعيـون ذوبــن نــار واشمـوع
وغيــر حـسين لتفتحـلّي موضوع
اذا مـا يطمـع النـورس بالــدمــوع

ادگ عالشـوف الچَـن لـون الغراب

**

اريد بدمعـي عالخـد ما يظـل راي
مثـل ركضـة ارقيـة موش بهــداي
اتراب وماي اصلچن وابچن الماي

اريدن عالحسيــن اتردن اتــراب

**

أحِــب كلماتچـن موقـف وعنـــــوان
حچيچن صدگ، معليچن بالـ اللسان
گالـوا ماكــو نـــــار بغيــر دخــــــان

وانه التَــل الشِـعَــل بالگـلب عطّاب


**

الفَله ابوجناتي ويطش دمعي ياريت
يـبـيــوت الدمــع زينــب ابلا بيــــت
انه شما صـــار اذان واله اتـوضيــت

نِـحِــت للي جمـر خيمتـهه محـراب


**

ما خـلّـص الطـف لليـوم، مـن قام
وبدمعچــن خَـل يِـرد لرمله جسام
بيچن لسـّـه ماي وضاميه اخيام؟!

ابدمعچن تطفه كل خيمات ابو تراب

**

عـاشــــــــور النـوايب ما تـرك حيـــل
من اذان الظُـهُــر بيه ابتــده الليــــــل
الحرم بالخيم بس اتشوف اجت خيل

تِـســـد اعيونـــهه لن ما يصــــح باب

**

كــــل ايــامچــن خـلّـنــــهـه للآل
الحزن مو موسم، اعله العُمُر تفصال
اريــدن عالهــلال اتطلعــن اهـــلال

ومحــرم من تهلّن يبــدي لو غــاب

**

سعد هادي الشمري
@saadhadi83 باز کردن / نظر دهید

2022-07-20 22:36:49 #السلام_على_فاطمه_العليله
.
.

كل ما جفن نام    تاخذني الاحلام
ولكربله انروح     وادخل للخيام


***


انه يا ليل العليله  العشت الجروح
شما يمر النوم اعيش ابحلم مذبوح
ويه النجم والنسمه طيف اتسافر الروح
روحي للعافوني وحدي امتيمه اتروح


واشتَّم التراب           بخيام الاحباب
وروحي ويه الدموع   تتزايد آلام


***


يم مهد عبدالله اگعد وانه اخته
اشفه من كل مرض من اسمعهه هزته
ولا يفز عطشان كل ليلي سهرته
ما اريد انظر على اجفونه دمعته


وابروحي اباريه     وبالضحكه اناغيه
ابقه انه الوليه       نام الطفل نام


***


غافيه ارقيه وشفت مبتسمه چنهه
على وجه احسين اظنّه انسد جفنهه
و يم وسادتهه بقيت اقترب منهه
افتح الترچيه خاف اتحز اذنهه


وبهدوة الليل      من تصهل الخيل
اتفز روحي واتروح  يم صدر الايمام



***


من اكول الخيم ليش النار تلهب
وشما صحت يا گمر هاشم تبچي زينب
ليش يمهه الماي بس ما ترضه تشرب
ومثل تَل اليم خيمهه الظهر حدّب


ولو گلت يحسين     اتصير الخيم عين
والفاتحه الريح        تقره اعله الاسلام


***


الطيف اسأله امن امشي لجروحي البعيده
ليش ليليه الدموع ابخد حميده
وليش زين العابدين انجرح جِيده
سكينه مو حنه بديهه وشو وحيده


و رمله تون ليش       و وسط الخيم جيش
يمهه الحسن جاي     شصار اعله جسام


***

سعد هادي الشمري

@saadhadi83 باز کردن / نظر دهید