2021-08-14 00:00:20
أجدام فرهدها الرمل ،
وچفوف عالبيبان ذبلت
ضعت بدروب المساوم ،
تشتريك الـ ليش وتبيعك الهلبت
مبحر بنيتك البيضه شراع ،
والظلمه شواطي بلايه ناس
ها يمسلم ؟
ليش اشوفك سهر والوادم نعاس ؟
ادري عثرات الگمر يم ليل .. ثلمه
وادري ما لمتك ريه وتيهت روحك بحضن الريح نسمه
وادري قسمه
ومو عجيبه الما يغني أبليس ما ينشاف نعمه
وانت نعمه
اليشتل حسين بضميره الماي كلش ما يهمه
وين ما تعطش الثوره أيفيض دمه
وين ما يصحى الشرار تشوف رسمه
اليشتل حسين بضميره يعيش حر
لـَوّن شاف البرد ضالم يشتعل گبل الجمر
وانت يـ أمورث الليل لهسه بعدك مشتعل شمعه غريبه
سافرت ماي لسواجيهم الصبخه وطشروك ،
ولمتك غيرة گصيبه
طيح يا مسلم يگمره الطاح شامخ يلگه فردوسه جريبه
ولو طيحاتك اسرار ،
وشوفهم ما عزب لملگاك بير
ولو كل الدنية ضدك وانت بس مرسال وياك وضمير
و (وين) مشتوله اعله شفتينك عطش
ماكو ناس بلون نيتك ،
هندس تفيض الولاية
شچم نهر بوجوهم ما حفظ مايه ؟
وتلتفت كلشي رخيص ،
ونثية ما تشبه گصصهم ،
فرعت شباچها بوجهك مضيف وفرزنت شوفك عبايه
ما رضت يكبر ضماك ،
ولا رضت تعتاز عين
تعذرتلك .. ( والله ما يستاهلونك )
ذبحوا الملگه اوي جيتك ،
چي قروا وجهك رساله من الحسين
و صلوا الشك على دربك ،
چي صدح صوتك يقين
يا سفير الماي غيم ،
باچر من أطيح يتشيم الطين
#جواد_زغير
159 viewsجواد زغير, 21:00
ج
