لمّا منزعل و منكتئب الكل بيلومنا وكأن هالشي بإيدنا ، بصيرو يتفلسفو علينا : بعدكن بأول عمركن شو ناقصكن لتكونو مبسوطين؟! ناقصنا كتير ، ناقصنا أمان ، حُب ، أمل ما يخيب ، مستقبل واضح ، شوفة ناس بعاد ، سند يسندنا بكامل تعبنا ومايميل ، قلب يحس فينا ، إيد تمسكنا لمّا نوقع ... مزعلنا تشتُّت شملنا ، ضياع أملنا ، موت روح الشباب فينا ، البرد واصل لروحنا وماعم نلائي حوالينا نتفة دفا ، موت أحلامنا عم يدبحنا ... ناقصنا كتير و جوّاتنا عتب كبير بس تعوّدنا نكتم كل شي بقلوبنا و نخبّي الضعف ونتظاهر بالقوة ، تعوّدنا الدمع يغرق مخداتنا و نصحا تاني يوم البسمة ع وجوهنا ... ما ننتظر شفقة من حدا ولا نستنى حدا يحس بوجعنا بلا مانحكي أو يشوف البكي المخبّى ورا قناع الضحكة المزيفة و يحتوينا ! مو ذنبنا إذا الدني قست علينا ... مو ذنبنا إذا الظروف عاكستنا و حوّلت ربيع شبابنا لخريف وكآبة . 154 viewsغياب ﭑﭑسۓﹻمژﭑﭑنۓﹻې ۦ،ۦ،ۦﮩ, 20:59
