2022-05-09 16:59:14
حتعلمك الأيام أكد .. الانت معاي ما اتعلمتو
وحتعرف لما يهزك شوق كم قيمة القلب الألمتو
البعتو رخيص في سوق الريد لجراح الفرقة وسلمتو
لا جيت من تاني تشوف البيه لا رقّ فؤادك كلمتو
؛؛؛؛؛؛؛؛؛؛؛؛؛؛؛؛؛؛
ما كنت بتعرف كنه الريد .. لا عشتو ولا جربتو زمان
بتخادع ذاتك .. زيف أحلام .. بتعيش الحب حسرة وحرمان
ماعرفت النوم في هدب الريد .. ما غلف قلبك اطمئنان
من قبل خطاي ما تدق بابك .. تزرع جواك .. احلام وأمان
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
غنيتك اجمل ما غنيت .. رتلتك في محراب الشوق
قلدتك اعلى وسام في الحب اديتك اعلى مقام في الذوق
عليتو مكانك قدستك .. خليت الكل شايفنك فوق
لكن عاندتٓ اتمردتٓ .. ومن دنيا هوايا كسرت الطوق
؛؛؛؛؛؛؛؛؛؛؛؛؛؛؛؛؛؛؛!؛
حتشيلا هموم غصباً عنك .. من حق القلب القصيتو
وحيبيعك زول ختيتو أمل .. بي كل تقديرك خصيتو
وحا تكسر قلبك بي عنادك .. علمته يجافي وعصّيتو
وسكبت الكاس المر فرقة وخليتني وراك امتصيتو
66 viewsاحمد سنهوري, 13:59