- لما تزور حد والحد ده ساكن في مكان بعيد والطريق لبيته زحمة او | نشرَوان للشّابِ الجامعي
- لما تزور حد والحد ده ساكن في مكان بعيد والطريق لبيته زحمة او مكسر ... مفيش داعي تحسسه انك اتبهدلت عشان تزوره ،.. هو بيبقي حاسس بالإحراج لوحده ... هو عارف ان المنطقة اللي هو عايش فيها زحمة ومكسرة ... وهو لو كان بإيده انه يسكن في مكان أحسن كان عمل کده.
- لما تزور حد شقته ضيقة او الجو فيها حر ... مفيش داعي كل شوية تتكلم عن شقتك الواسعة وتتكلم عن أهمية البراح والوسع والتكييف مش لازم تنغص عليه حياته .... هو لو كان قادر يشتري قصر ماكنش إتأخر.... هون عليه وحسسه ان شقته جميلة وفيها بركة رغم انها مش كبيرة. - مفيش داعي تهزر مع حد بكلام انت عارف انه بيضايقه لمجرد انك بتستمتع بده.... للأسف في ناس بتتبسط لما تشوف اللي قصادها محروق دمه ومضايق.
- مفيش داعي كل ما تشوف صاحبك تفكره انه تخين وشكله وحش.... هو حافظ شکله كويس ومضايق منه.... لو عندك نصيحة تنفعه في مشكلته وهو هيقبلها قولهاله ... غير كده بلاش تحرجه.
- مفيش داعي تتكلم عن مدرسة ولادك الغالية النضيفة اللي بتعمل أنشطة كتير قصاد واحد ظروفه المادية إضطرته يودي ولاده مدرسة متواضعة جدا.
- مفيش داعي تتكلم عن عربيتك وإزاي هي بتسهل عليك حياتك قصاد واحد طلعان عين اللي جبوه في المواصلات كل يوم.
الانسان بطبيعته بيحب يحس بالتميز ... وبيحب اللي حواليه يحسوا بتميزه بده... وأحيانا شعوره بالتميز بيبقي مرهون انه يشوفه في عيون الآخرين .... بس الأسلوب ده ممکن یکسر قلوب ناس حوالينا وينغص عليهم حياتهم. *** |محمد أنور |
