تقريباً اغلب الاسئلة او الحوادث الاضطر اكتب عنها اني كاتبها مس | Shabakty

تقريباً اغلب الاسئلة او الحوادث الاضطر اكتب عنها اني كاتبها مسبقاً بس ماتذكر او اتعاجز ارجعلها واطلعها من بين الجرايد لذلك كتابتة جريدة جديدة اسهل من تذكر القديمة بالنسبة الي. هذه البوست مكرر لكن أشوفه مطلوب للاسف.
داشوف هواية بوستات ازلية عن البحث عن وظيفة.. بكل صراحة اني ميشدني اكتب جرايد واحجي عن حياتي الشخصية الا للناس اللي فعلاً محتاجة وظيفة بشكل جدي.
ياناس ياعالم البحث عن وظيفة بكل العالم نفس الشيء الفرق هو الطريقة لا اكثر ولا اقل.. العراق أرض خصبة لاعمال الدرتي لذلك اما تستغلها لصالحك بامور مفيدة أو تضل تنوح وتبچي على وظيفة بدون متتحرك.
تجربتي: بدون مافيك عليكم بيوم من الايام چنت حاس بانكسار واني يوزلس بمعنى الكلمة أصعب شعور هو لما تحس انك زبالة ومو مفيد بعائلتك فعلاً شعور مؤلم خصوصاً. چنت محتاج شغل كلش كلش كلش بس حتى التهي واثبت نفسي اني اكدر احصل فلوس واثبت لاهلي اني أكَدر اعتمد على نفسي وأنتهى وقت أخذ مصرف من اهلي, بنفس وقت چنت استحي وابيع كرامة وماطلب من احد "واسطة" للاسف مله دخل "بالاخلاق او ماحب الحرام" لكن فقط هالنقطة مال طلب من الناس اني ماحبها رغم انها مفيدة كلش والنتورك مالتي مستعد انه يقدملي واسطة لاني اساعد بالمثل. لكن بيوم من الايام وصلت حدها اريد شغل باي طريقة حتى لو عامل نظافة ف ضليت افكر افكر افكر شون احصل وظيفة واعتبر نفسي اني معارفي 0%. وبالحقيقة اني 0% بمعنى الكلمة لان ماعندي تجربة سابقة وماحب اسال احد حتى ليعرف دادور شغل وحتى سيفي ماعرف اكتب. بحثت بوقتها شون اسوي سيفي شفت الموضوع ضحك.. ماعرف شنو املي هواية بيانات هواية تفاصيل يريد واني ماعرف اعبر عن نفسي انكسرت اكثر ولغيت فكرة السيفي. بعد التفكير وصلت الى الخطة التالية:
أني وداتصفح بهالسوشل ميديا الزبالة بوقتها شفت باحد تعليقات سبامر مال "عاوز تعرف مين زار بروفايلك بلا بلا بلا ابحث عن MBC123 الخ.." وأجتني الفكرة بوقتها مباشرتاً بحثت بالانترنت عن "بوتات التفاعل" بوقتها چانت طاشة سالفة بوت التفاعل فجرني افجرك بوتات مزبلة على Github.. وأخيراً وليس اخراً لكَيت نسخة قيد التطوير من العزيز والغالي برنامج jarvee اللي هسه هو برنامج طاكَ وجاب ملايين دولارات.. بالنسبة الي احترمه لانه بسببه لكَيت شغل 3 مرات بدون ان انذل لاحد. هو برنامج تكدر من خلاله تحول حاسبتك الى بوت يتحكم بحسابات سوشل ميديا وصعب ينحظر لانه يستخدم الmacro records ايضاً يتصرف كانه بشر وليس بوت.
بكل بساطة أنضميت للبيتا تيستر وجبت برنامج جارفي العزيز وسويتلي حسابات وهمية ميعرفها احد من معارفي وكتبت كليشة صادقة بدل السيفي فحواها " أنوا اني محتاج شغل لفلان سبب وماعرف اكتب سيفي أچذب بيه لكن اعرف هيج وهيج وهيج ومشتغل هيج وهيج وهيج سابقاً وقريب على فلان منطقة ومستعد اشتغل أي مدة مطلوبة قيد التجربة الى ان اثبت نفسي للتواصل رقمي وايميلي بموقعي بفلان رابط علماً ان هذه حساب وهمي لغرض البحث عن وظيفة لا تقم بمراسلتي عبر مسنجر وشكراً".
أقسم بالله.. وغلاتها لامي.. باليوم الرابع من تشغيل البوت حصلت على وظيفة سهلة كلش كلش براتب 600 الف بوقتها. المكسب ماجان بالراتب بالعكس راتب زبالة والوظيفة زبالة والتعامل زبالة لكن المكسب ان من خلال الوظيفة الاولى كَدرت بسرعة كلش كلش بسرعة احصل على وظائف اكثر وفرص اكثر.. واكسب خبرة اكثر وكل ما اجي اشوف الطريق مسدود ارجع للبوت هذه وانشر نفس الكليشة.. ولله وصلت بعض الاحيان تجيني فرص مقابلة اروح اطيها لاصدقائي او اي احد يريد وظيفة. لا واسطة ولا اي شي روح بدالي وقدم قبلوك حلال عليك.
دائما كان السوال المحرج بالنسبة الي وين السيفي مالتك.. جوابي دائماً فحواه كان مشابه ل " أستاذ تريد أجيبلك سي في أكذب بيه عليك لو تريد موظف يشتغل شهر مجاني وتجربه بنفسك أني اعرف فلان شي وفلان شي وفلان شي" ودائماً چان يكون جواب جداً كافي بديل للسيفي على الاقل بالنسبة الية. لكن اكو مدراء او اصحاب عمل عراقيين همه مو مدراء حقيقين بل اطفال ومراهقيين هدفهم يكسبون النقاش او ميبينون بصورة ضعيفة وماينطون اهمية للشغل ابداً. لذلك احياناً اذا تبين مكسور امامهم وتخليهم يفوزون النقاش باي طريقة كان ويبينون انهم "Boss" ف رح تحصل شغل حتى لو جنت مو الشخص مطلوب للمهنى. والغلط اللي زعل منه احد الناس اللي قابلتهم هو اني بالبوت طالب منهم يراسلوني "هذه النقطة اللي جرحت مشاعر المراهق المدير انه شون يراسلني وهو اني اريد وظيفة" بالتجربة الثانية غيرت الكلام الى "اتمنى ترسلون الي او تردون على تعليقي بوسيلة التواصل او التقديم للوظيفة واكون ممنون منكم" بالتجربة الثانية نتائج اقوى واكبر بسبب هالشغلة تافهة.