أكو شغلة كلش قذرة تصير بس بدون علم اصحابها 'عالاغلب' وحتى من | Shabakty
أكو شغلة كلش قذرة تصير بس بدون علم اصحابها "عالاغلب" وحتى من متابعين البيج هنا تسووها وياية واني ماحب هالشيء..
من أجي احجيلك فد trick او مصيبة او تجربة عن موضوع او عن حياة شخص اعرفه او عرفته او عن كميونتي ماكو اي منطقية لما تجي تسالني وين هذه شخص اريد اتعرف عليه او تريد انطيك حسابه ؟؟؟
بشرفك انت من تراسلني خاص وتحجيلي عن شغلة بحياتك مثل "فشلك بمشروع" هل تقبل اروح احجي على تجربتك الفاشلة وانطيهم حسابك حتى يراسلوك ؟ هل هنا انت رح تحترمني بعدها ؟ هل انت لو تريد الكوكب كله يعرف جان جيت كلت الية بس ؟ بالعكس مارح تحترمني بوقتها ولا رح تثق بيه لان داطلع اسرارك وانشرها للناس حتى لو كان هدفي ان ناس تستفاد من تجربتك ف اني هنا ما احترمتك لما نقلت هالامور بدون اذنك وحتى لو قررت انقلها بأذنك مارح تقبل انت. ماكو احد بهالكوكب يحب الناس تعرف نقاط ضعفه او فشله ويسويها مادة للغرباء
زين شلون انت تقبل انطيك حساب الشخص فلاني او البنت الفلانية اللي اني حاجيلك عنها ومطلع كل خياساتهم ؟
أني لما انقل قصص الناس والتجارب احرفها كلش احرفها في سبيل انت ماتكدر توصل لصاحب القصة او المصدر رغم ان اكو ابطال كدروا يوصلون لاصحابها واني اغلس عليهم بس بالنهاية مو من صالحي ولا من صالحك اني اكلك مصدر التجربة اللي حجيتها.
وسلبياتها بشكل شخصي كالتالي: - صاحب القصة مرح يحترمني بعدها وممكن انهان واطلع من نتورك مالته - نفسياً اذا تعرف مصادري مرح اكدر أچذب عليك براحتي بالجرايد - اخلاقياً اني اللي سويتة كلش عيب
لهذا لما تشوفني ماجاوبك او اغلس او ماكلك عن الصيني/الهندي/الجوكري/السنغافوري/الاوربي اللي سوة فلان شغلة أني حاجيلك عنها لو المنتدى/الكروب/التجمع/الموقع اللي اني التقي بيه مو لاني ماريدك تنجح او اني ضدك بل لان الشي دتطلبه انت مو منطقي ابداً ولا رح تحصل شيء لما تراسل شخص وتكله اني اعرفك من فلان بوست حجه عليك واريدك تحجيلي اكثر لا تتوقع من تكله هيج رح يكلك اهلا بيك تعال اي خلي اعوف وقتي اللي بفلوس واكعد اجاوبك انت الشخص الغريب اللي ماعرف حتى منو هذه ناشر عليه ولا منين جاب هالمعلومات.
لما تحترم خصوصية الاخريين رح تحصل على هواية امور.. كلش هواية امور تحصل ولا تضل تركز انك تحصل على الشخص دنحجي عنه استفيد من تجربة وابحث عن تجربه نفسها لا تتبع القطيع معفن هذه ويصير هدفك بس تضيف الشخص عالفيسبوك او تكسبه ك صديق لانك مارح تحصل شيء بوقتها لانك عربي / مسلم متدين / بفكر دول العالم ثالث محد رح يساعدك او يبني نظرة اولى عليك صحيحة بسب هل ثلث امور الا اذا چنت #مريش او #متمكن بوكتها رح يكون كلشي بحسابه $$$.
واني الف مرة كتلكم اني احرف المعلومات في سبيل اوصلكم تجربة حتى لو كدرت تعرف مصدر التجربة مارح يكدر يعرفني هو لاني شارحلكم شون انشاء شخصيات وهمية واجيب هالمعلومات والشيء الاخير هو اني ما انشر الحدث بنفس المدة بل انتضر فترة الى ان ينسى الموضوع يلة اشاركه بحيث ميعرفني. وانتو هم نفس الشيء مرات من تصير احداث او تجارب اسمعها منكم هم انقلها الهم وهمين ما اكوللهم فلان شخص صاحب هالتجربة او فكرة ببساطة اني منفذ المثل العراقي "جسر للطيبين" انقل تجارب بعض بدون ما اذكر مصدر ولحد الان الكل ديستفيد والكل عايش بسلام فقط من جانبكم لا تظلون تراسلون وتطلبون تعرفون حسابات اشخاص من عندي لان ما اشارك ابداً اللي ميحب يصدك البوست يعتبره خريط مثل ما هواية كروبات ميقتنعون ببعض جرايد ويعتبروها خريط او يصفوها بجريدة انت همين اعتبرها خريط وجريدة وغلس.
أتعلم تبحث بنفسك وتلكه مصادرك بنفسك اني مجرد انطيك راس الخيط لا اكثر.. بوكتها رح تحصل على نتيجة تكون انت راضي عنها مو تصل لمرحلة اللي هسه انت بيها "تضوج" اني اتواجد بنفس كروب او تجمع انت بيه لانك خامط امور من عندي وناشرها ك رأييك الخاص ومتحب اتواجد حتى لاتنفضح لا تخاف مارح افضحك بالعكس متعود اني على هالشيء ومنطيكم كل الحرية بخمط الجرايد والافكار بس بنفس وقت اشتغل على نفسك اذا رايد توصل لمرحلة تكون ماتخاف او تخجل من اني اتواجد بنفس تجمع اللي انت تخرط بيه لانك رح تكون منافس اليه بوقتها لا اكثر ولا اقل وهذه الشيء الاني احبه.
