مفتوحه..بس مزنجله البوب... راحت هله من ذيج الگلوب... ضيجة خلك. | شمة الرگبة

مفتوحه..بس مزنجله البوب...
راحت هله من ذيج الگلوب...
ضيجة خلك.. لو ضيجة دروب
مرات حدر ضلوعك حروب...
دم الضحايا يحمر الغروب....
نكطن عليهم عمر يحبوب...

راحوا الچانوا شبگه بالخوف...
ونسد عليهم باب الطيوف...
كل حبل ما سوالي معروف...
يفتل غصب من تطلع الاوف...
چا هيج گلبي تتن ملفوف...
وعيوني البدهن بالچفوف...

نخدر تعب..بس عود غافين؟
يا بال يسكت بالزنازين..
وي ختلة الضويات ماشين
يخطف حچيهم عالحياطين..
گطعونه فرحه من البساتين....
وشگد چذب فوگ السنادين.......

يا بحر شتروف السفينه....
ودمعاتنه مبينه بحجينه....
صفن دوايرهم علينه...
بس ما درينه شطاح بينه..
يا وجع شيغسلك بجينه...
من يبعد الغيم اليجينه...؟

يبدي الوجع وي هدوة الناس...
وتبحر ظنوني نجوم عالراس...
يا فرح من يا صوب تنجاس...
يم شفتي و كسروك يا كاس...
هايه جزاة الماي يا فاس...؟
يله درب... مكتوبلي انداس..

عمار التميمي