#گئجه_لنمیش_دیله_ییم بیر ایچیم دینله منی آی گئجه لنمیش دیله ی | ترنم غزل

#گئجه_لنمیش_دیله_ییم

بیر ایچیم دینله منی آی گئجه لنمیش دیله ییم!
سریلیر سوزلریمه های، گئجه لنمیش دیله ییم

قالانیر قارقالارین قارقارینا قانلی سئونیج
چیله نیر گؤزلریمه ، وای ،گئجه لنمیش دیله ییم

اورییم ایچره دولورسئل سئل آخان بوشلوق لار
سئوگیمیزدن سوزولور چای گئجه لنمیش دیله ییم

سؤکولور دویغولاریم چیپچالانیر خاطیره لر
قان اولور دمله دیگیم چای گئجه لنمیش دیله ییم

تئللریمدن گویریر بوز آغاجی ،قارلی چیچک
قار قیش اولدو ساچیما پای گئجه لنمیش دیله ییم

گونشین گوزلرینی کال قارالیق لار سورویوب
باری سن یای گئجه مه ، آی ،گئجه لنمیش دیله ییم

اورییم ده بوغولور ماهنی لارین اینجه جانی
نئچه یول گور اؤلورم سای گئجه لنمیش دیله ییم

داغیلیر چنلی دومان خوشلوقومون تئللرینه
شافاغی آغری لارا یای گئجه لنمیش دیله ییم

#شافاق
#پورحسن
سس:#سید_محمود_مظفری

‍ @shafaqkhoy
@sm_mozaffary
•┈┈•°•✾•° °•✾•°•┈┈•