2022-04-01 17:51:45
كلها يوم ويهل علينا شهر رمضان المبارك، أعاده الله علينا وعليكم باليمن والخير والبركات .
وعلشان هدفنا صحتك، فحبينا بوست النهاردة يكون عن الأخطاء الصحية اللي كتير مننا بيعملها في شهر رمضان خلال الإفطار والسحور، ومش بس كدا لا دا احنا كمان هنذكر أهم العادات الصحية خلال صوم رمضان؛ علشان رمضانك يكون أفضل وجسمك يكون مستعد للعبادة والطاعات يللا بينا .
أول حاجة بقى إن البعض أول مايسمع الآذان هوب على كوباية الماية الساقعة أو العصير أو المشروبات الغازية، ودا خطأ كبير جداً؛ لأنه ممكن يتسبب في مشاكل في الهضم.
والأفضل طبعاً اتباع السنة والإفطار على تمر؛ لإنه غني بالسكريات البسيطة اللي بتتهضم بسهولة، وكمان بترفع سكر الدم بصورة معتدلة ولو مفيش تمر يبقى ماء عادي مش ساقع.
تاني حاجة بقى إن البعض يبدأ الإفطار بأطعمة دسمة غنية بالدهون زي المقليات أو الحلويات ودا كمان غلط جداً؛ لأنه هيعمل تراكم للدهون وهيسبب سمنة.
وزي ماقلنا أفضل شئ نبدأ بيه الفطار هو السكريات البسيطة زي التمر، وبعدها أكل صحي منوع بين البروتين والنشويات والدهون المشبعة والخضروات، وأفضل وقت للحلويات هو بعد الإفطار بساعتين.
كمان في نقطة مهمة جداً وهي تناول كمية كبيرة من الطعام مرة واحدة.
والأفضل طبعاً تجزئة الطعام على فترات متعددة.
لازم ناخد بالنا إن عدم ممارسة الرياضة بصفة عامة سواء في رمضان أو غيره بتأثر بالسلب على جودة حياتنا، لكن البعض بيقع في خطأ ممارسة الرياضة بعد الأكل مباشرة في رمضان ودا ممكن يسبب سوء هضم.
وأفضل وقت للرياضة في رمضان بيكون قبل الإفطار بساعة أو بعده بساعتين علشان تسهل عملية الهضم.
دا كان بخصوص وجبة الإفطار.
نيجي بقى لوجبة السحور واللي البعض بيهملها ودا خطأ شائع؛ لأنها مهمة جداً للجسم وبتزوده بالطاقة اللازمة أثناء الصوم.
ولازم تحتوي على غذاء متنوع ما بين البروتين والنشويات المعقدة؛ علشان متتهضمش بسرعة وتساعد في سد الجوع لفترات طويلة، وضروري برضو تحتوي على فيتامينات وألياف؛ لأنها بتمنع الإمساك وبتحافظ على رطوبة الجسم وتقلل الشعور بالعطش.
ومن الحاجات الخطأ اللي بنعملها في السحور هو شرب كميات كبيرة جداً من الماء قبل الصيام، ودا مش بيمنع العطش زي ما البعض فاكر بل بالعكس بيزيد الوضع سوء؛ لإنه بيزود فرص خروج الماء عن طريق البول والشعور بالعطش بسرعة.
والأفضل إنه يتم تقسيم الماء على فترات بمعدل لترين إلى ثلاثة كل يوم بين الإفطار والسحور.
كمان لازم ننبه إنه يفضل الابتعاد عن الأطعمة المالحة وقت السحور؛ لأن الصوديوم الموجود فيها بيسحب الماية وبيخلي الشخص يشعر بالعطش.
والأفضل تناول الأطعمة الغنية بالبوتاسيوم زي الموز ويكون باعتدال بمقدار موزة خلال وجبة السحور؛ لأن البوتاسيوم بيقلل الشعور بالعطش، كمان من الأطعمة المفيدة في السحور الزبادي لأنها غنية بالبكتيريا النافعة "البروبيوتيك" اللي بتحسن من كفاءة الجهاز الهضمي.
ومش هنقول إن شرب المنبهات والكافيين ممنوع بس يكون باعتدال بمعدل كوبين إلى ثلاثة أكواب يومياً.
وفي الختام نتمنى لكم صوماً مقبولاً مع دوام الصحة والعافية.
#INFO_LAB.
#معمل_المعلومات.
#معلوماتك_تغير_حياتك.
256 viewsZạkạrᎥạ Ꭿℓ-roᵯạᎥᵯạ, 14:51
ص
