2024-05-01 23:50:11
( البل الحلال أهووووو )
في التاسع من ابريل الماضي طلع البرهان في التلفزيون و قدم خطاب ( اللاءات الثلاث ) .. لا عودة للقحاطة لا عودة للجنجويد .. لا عودة للكيزان .. و قال للحديث ( بقية ) بعد نهاية معركة الكرامة .. يعني في كلام كتييير بس ده ما وقتو .. بعد المعركة ح يتكلم .. و ده الطبيعي جدا" .. كلنا محتاجين لإجابات تساؤلات في رؤسنا .. لكن هل ده توقيت للاسئلة و الإجابات ؟؟
اتحاصرات مدينة ( للينجراد) الروسية سنة ١٩٤١م قرابة السنتين و كانت جيوش المحور قريبة جدا" من العاصمة موسكو لكن بين ليلة و ضحاها انقلبت الآية و تم القضاء على الجيش السادس الالماني و زحف الجيش الروسي في هجمة مرتدة و سقطت برلين .. ده كلو مافي زول في روسيا كان بيسأل اثناء المعركة عن الاسباب الادت لانسحاب الجيش الروسي و جعلت للينجراد محاصرة و لا في زول في المانيا كان بيسال اثناء المعركة عن اسباب السقوط المدوي لبرلين .. الشعبين الروسي و الالماني كانوا مشغولين بس بالمعركة .. فلا حديث يعلو فوق صوت المعركة .. حتى الصهاينة لامن سالوا عن الاسباب الادت للفشل الاستخباراتي في السابع من اكتوبر الماضي طلع الناطق الرسمي باسم الجيش و قال ليهم لا حديث يعلو فوق صوت المعركة .
المصريين انهزموا في ٦٧ هزيمة نكراء و مافي زول كان بيسأل عن اسباب الهزيمة الا تحت تحت في ونسات القهاوي .. و اشتغلو ستة سنوات حتى استطاعوا انو يثأروا في اكتوبر ٧٣ .
إحنا في السودان اتربينا و احنا اطفال على انو ناخد حقنا في الاول حتى بعد كده نراجع المشكلة قامت كيف و الغدر جاء كيف و الخيانة كانت من منو ؟؟
في مجموعة مستوهمة جدا" بتتعمد انها تضلل الناس بي اسئلة وهمية و في توقيت غير توقيتها .. بيتعمدوا إنو يشككو في القيادة و يتهموها بالخيانة اثناء المعركة و لامن نعترض عليهم بيتهمونا بي شق الصف .. سبحان الله .. الطعن في قيادة الجيش ما بيعتبر ( شق صف ) لكن وقوفنا خلف القائد و دعمنا للقادة يعتبر تطبيل و شق للصف .
بيقولو ليك إنو البرهان كان بيتجاهل تقارير الاستخبارات العسكرية الكانت بتحذره من خطورة المليشيا .. طيب يا كائن انت عرفت المعلومة دي كيف ؟ خالك بتاع الاستخبارات قال ليك برهان كان بيتجاهل تقاريرنا ؟ ولا ديل دفعتك داخل الاستخبارات قالو ليك كده ؟؟
من البديهيات و من المعلوم للعامة إنو رجال الإستخبارات الحقيقين في كل العالم بياخدو منك المعلومات لكن ما بيتبرعوا ليك بي معلومة .. اذا في بتاع استخبارات اتبرع ليك بي معلومة يبقى لازم تعرف إنو ( تامي بيك شغل ) يعني المعلومة الاداك ليها دي عايزك تروج ليها عشان يحقق بيها اهداف او بيضحك على مخك الكلو مخاطة ده .. الغريب انو ذات المجموعات دي لامن كنا بنقول قبل سنوات إنو في معركة بين الجيش و الدعم السريع لكن مؤجلة كانوا مجتهدين تماما في نفي الرؤية و بل كانوا بيطبلوا لحميدتي .
الجيش السوداني خلال قتاله في الجنوب و الغرب طيلة عهد البشير كان بينسحب من مدن كتيرة بالايام و الشهور و السنين و بيرجع تاني يحررها .. ليييييه ما كنا بنسمع الأسئلة الكتيرة دي وقتها ؟؟ في عهد الانقاذ سقطت الكتير من المدن و الحاميات .. لييييه ما كنا بنشوف صحفيين و نشطاء الغفلة بحدثونا عن خيانة القادة ؟؟؟ ليييه ما كنا بنشوفهم بيتساءلوا عن اسباب الانسحاب و السقوط ؟؟
البشير كان كل يومين بيقول لينا ( الجمعة الجاية ح نصليها في كاودة ) كان بيحدد التوقيت عدييييل كده .. وين كانت صحافتنا و نشطاءنا من وعود البشير بالصلاة في كاودا ؟؟ و لا اتعلمتو الأسئلة هسه مع الكباشي و البرهان .. اقولها ليكم بي وضوح .. الصراخ و التضليل ده كلووو بسبب انو في مجموعة عارفة تماما" إنو اسلوب البرهان بتاع ( الحفر بالإبرة ) ليس حصرا" على المليشيا بل الإبرة ستحفر في مؤخرات الجميع .
المصريين عندهم مثل جميل جدا" بيقول ( اخد الحق حرفة و رد الغلط ليهو أصول ) و البرهان بيطبق في المثل ده تماما" .
يلاااا بينا و باي من غير سلام
نزار العقيلي
تابع قناة السودان علي تلغرام
https://t.me/sudaaan
30.7K views20:50
ا
