2021-09-23 06:31:01
يوم فرحي كنت متوترة جدا وموترة كل اللي حواليا ودي مش شخصيتي والا عادتي بس الحمدلله ان كان حواليا ناس بيحبوني وتفهموا ان ده توتر.
كنت بزعق في صحابي واخواتي البنات واي حد يقولي كلمه اقولهم محدش يسالني ، سبوني لوحدي طيب نساعدك في اللبس اقولهم لا محدش يساعدني هلبس لوحدي .
وبالفعل لبست لوحدي ولفيت الحجاب وحطيت الطرحة ومن بعدها بدات اهدا.
طبعا محدش فاهم كل ده ليه.
بس انا فعلا كنت بمر بدور اكتئاب وتوتر عمري مامريت بيه في حياتي .
مليون سبب .
بس في بعض الاسباب كانت قويه جدا وهي اني لاول مرة في حياتي اكون مقلقه من شكلي او بمعنى اصح مقلقه شكلي هيطلع ازاي .
وخصوصا اني كنت عاوزه اكون بشعري في فرحي وفستان براحتي بس ظروف عائلتنا انا ومحمد منفعش اني اعمل فرح بالطريقه دي وخصوصا انه حاجه جديده عليهم.
مفيش جدال في ان كل بنت نفسها تطلع حلوه في يوم مميز زي خطوبتها او فرحها او اي يوم مميز ليها.
بس حقيقي انا من الناس اللي النقطه دي دايما كانت اخر اهتماماتي مدام المناسبه مختلطه مكنتش بيقرق معايا، كنت دايما بركز على ان البس حاجه اكون مرتاحه فيها وسايبه حوار شكلي ده للاخر.
وفي كل مره ربنا بيجبر بخاطري وشكلي مش بيطلع وحش سواء كان يوم خطوبتي او يوم كتب كتابي، لان انا اصلا لا تستهويني تماما حوار التجمل بالمكياب او الكلام ده ويمكن دي نعمة لازم اشكر ربنا عليها لان الاحساس ده ساعدني في اني اثبت .
الا يوم فرحي، كان في شويه ناس متسلطين عليا بطريقه صعبه .
جيت في مره وحدة كانت بتسالني في اسك هتحطي ميكاب ف فرحك قولتلها لا. ومن ساعتها كل شويه وحدة تدخل تقولي ده ليلة العمر ، خطي ميكاب مش هيجرا حاجه.
واللي تقولي شكلك هيبقى باهت، واللي تقولي معروفه القستان الابيض لازم ميكاب علشان يظهر.
واللي تسالني تقولي هتجيبيي ميكاب ارتست مين اقولها مش هجيب ، طيب هتجيبي مين يحط الطرحه ، اقولها ماحنا من يومنا بنلف الطرح لنفسنا ايه الجديد يعني .
واللي من المقربين يقولي ابتسام انتي مجهده بقالك فتره وشكلك مش هيكون مرتاح حطي ميكاب مفيهاش حاجه .
لدرجه اني بدات احس اني بعمل حاجه مش طبعيه ، اللي هو يا جماعه طبيعي مدام في رجاله هتشوفني في فرحي مع اني حاولت ان يكون فرحي منفصل بقدر المستطاع الحمدلله والموضوع كان حلو جدا بس مكنش منفصل كليا وفي رجاله هتشوفني فطبيعي البس حجابي ومحطش ميكاب.
اينعم انا عمري مافكرت اني احط ميكاب او اقصر الحجاب بس كنت حاسه من كلامهم ان في حاجه غلط وشكلي مش هيكون مقبول
بس والله الرسايل كانت مل يوم بتزيد لخد يوم الفرح وانا بنزل استوريز قبل مالبس والاقي ناس تبعتلي حطي ميكاب يا ابتسام متعقديش الدنيا.
طلعلي حبوب في بوقي والتهب جدا في ثانيه لدرجه اني مكنتش عارفه احط زبده الكاكاو حتى، وبعت الصور للدكتوره قالتلي ده من التوتر اهدي بس.
كل ده وانا حقيقي كنت خايفه لاول مره شكلي يطلع وحش.
انا عمري ماجربت الاحساس ده، عمري ماخوفت شكلي يطلع وحش والا خوفت شكلي اصلا يطلع حلو او وحش،
اول لما لبست الفستان الابيض وكان واسع عليا بسبب اني خسيت من التوتر بردو اضايقت زياده وقولت للبنات الفستان واسع ، لفيت الحجاب وحطيت الطرحه والتاج وببص لقيتي مش وحشه ، لقيتني مرتاحة وفرحانه بشكلي كعادتي وركزت في يومي وفي فرحي، يمكن مكنتش اجمل وحدة بس انا اصلا عمري ماكنت عاوزه اطلع اجمل وحدة ،
دايما في اي مناسبه تخصني كنت ببقى عاوزه مبسوطة بنفسي واعمل فستان حلو مناسب للمناسبه بس عمري مافكرت اني عاوزه اكون اجمل وحدة .
لقيت ربنا جبر بخاطري للمره المليون وهديت واقتنعت بشكلي ورجعلي احساس الثقه في نفسي. مع ان الحبوب والالتهابات اللي كانت بدات تطلع في بوقي ووشي كانت مضايقاتي وتاني يوم وشي كله التهب .
اللي عاوزه اقوله ان الناس بتصعب الثبات على بعض.
الفترة دي والكلام ده عمري ماهنساه لانه اثر عليا بالسلب جدا.
ومش عاوزه اقول بقى اني عملت الحاجه الواو المستحيله اللي محدش يقدر يعملها وطلعت من غير ميكاب وبتاع بلاش نكون اوفر علشان هو ده الطبيعي اصلا مدام الدنيا مختلطه انا مطلعتش المريخ يعني.
بس الكلام اثر عليا بالسلب لاننا بشر طبيعي وبنتاثر.
فياريت منكونش لبعض شياطين الانس ونساعد بعض على الثبات.
عاوزه تحطي ميكاب وتكوني بشعرك اعملي فرحك منفصل تماما زي مابيحصل في بلاد كتير.
فرحك هيكون مختلط البسي حجابك وفستان ميقللش من حجابك واكتفي بالحنه مثلا انا عملت حنه بنات بس وعملنا ولبسنا فينا كل اللي احنا عاوزينه.
ونفس الكلام كان على طريقه الاغاني في الفرح واللي يقولنا هنيجي الفرح نحج واللي يتريق بس بردو الحمدلله شغلنا اناشيد بالدف وكانت حاجه جميله وفصلنا الستات عن الرجاله وهيصنا مع اني سمعت تنمر كتير بس انا كنت مبسوطة جدا بفرحي، وعملنا فرحنا واول يوم لينا بدون تجاوزات بقدر الامكان الحمدلله .
والاهم من ده كله اختاري شريك يكون شبهك ونفس مبادئك ويساعدك على تخطي كل ده، علشان متحسيش انك بتحاربي لوحدك..
#ابتسام_القاضي.
426 viewsتنزيل صابر , 03:31