' يوم عيد ميلادي اللي فات فضلت ماسك التلفون اكتر من ٥ ساعات ، | شَــمـس
" يوم عيد ميلادي اللي فات فضلت ماسك التلفون اكتر من ٥ ساعات ، مستني رسالة معينة ومعتقد ان الشخص اللي قاعد مستني الساعة ١٢ تيجي عشان يقولي كل سنة وانت طيب ، مرت الساعة ١٢ وفضيلت مستني لحد ما نمت وانا ماسك التلفون.. الرسالة جاتلي بعد يومين مفرحتش ، انا كنت مستنيتها تيجي الساعة ١٢ .. ف يوم كنت مخنوق من موضوع معين وعايز احكي مع حد ، اتصلت بواحد صاحبي كتير مردش ، فضلت ماشي ف الشارع بعد المدرسه متضايق لوحدي ، عايز أعيط عياط هستيري كأن حد مات لدرجة انه واحد جه ووقفني وفضل يحكيلي طب اهدا و ان شاء الله خير ، روحت البيت ونمت ، صاحبي اتصل بعد يومين واعتذرلي انه كان مشغول جدا الفترة اللي فاتت ، فضلت ساكت مش عارف اقوله ايه ، كل اللي كنت بفكر فيه وقتها شكل الناس وهما متعاطفين معايا صاحبي اعتذر مليون مرة بس انا من جوايا اتكسرت وعمري ما هحتاجه تاني .. كان عندي صاحب قريب وبيننا عشرة ومواقف حلوة ، في مرة زعلنا مع بعض وكان هو اللي غلطان ، استنيته يجي يصالحني ، عدي شهر جاي يصالحني وعاملي مفاجأة و جايبلي الحاجات اللي بحبها .. انبسطت كتير لأَنِّه كان واحشني ، بس عمري ما عرفت أرجع أتعامل معاه زي الاول لانه اتأخر كتير .. يوم نتيجتي في الأمتحانات كنت متخانق مع اهلي بس أول ما عرفت اني جبت درجات كويسه قعدت عندهم وانا مبسوط وحكيتلهم النتيجة طلعت ، مابصوليش حتى ، قالولي مبروك بس.. بعد شوية جم يحضنوني ويقولولي مبروك ويهزروا معايا ، انبسطت بس مش كتير لاني كنت مستني منهم انه من الفرحة يقوموا يحضنوني ساعتها و ننبسط كالعادة ، بس ردة فعلهم جت متأخرة شوية.. اوعوا تفكروا إنه في شخص هيفضل يحبكم على طول بلاش تتأخروا وتأجلوا الاشياء لحد ما شغف اللي قدامكم في الموضوع يروح ، طعم الاكل لما تكون جعان احلى بكتير من طعمه لما تكون بتاكل عشان زهقان وخلاص .. ما تدخلوش ف علاقة صداقة او غيرها الا وانتوا قد اللي دخلتوا فيه ، قبل ما تدخلوا اي علاقة وتعشموا الناس فيكم ، اعرفوا واجباتكم ايه نحيتهم الاول و لما تغلطوا اعتذروا ف وقتها ، قولوا للناس انكم بتحبوهم اول ما تحسوا بمشاعر نحيتهم و ماتترددوش .. الوقت بيقتل المشاعر ..!!"
