2021-06-22 11:43:46
مِرَوونه ایمام رضا را....
شو روز گردم و چاره ندارم
اسیرینه گذری روزگارم
اگه قابل بزونی کفتری شی
بام اشته که پره کو سر جیدارم
بمونم دیما دیم ایوون طلاکو
دیلی انگل بژنم اشته پاکو
هده دخونوم اشته پاکه نومی
چمه سس دخنی اشته سراکو
اشته پنجره فولادی بیگرم
غمی دسی کو ام دیلی جیگرم
مه اَ خشکه رواری شی اومیمه
اشته سقا خونه کو آو پیگرم
ترام اشتنه هیچی ورده نییه
بغیر ام اسرگه ریه ریه
شاید دونه شیوار چمه اسرگی
اشته کفتر اومه ایله پِچییه
لاله دنیا اشته مرقَدی قربون
اشته زرده خاصه گنُبدی قربون
چمه ده ده همیشه وای ،اَقه جان
سرم اشته سَییده جدی قربون
کیه چمه دیلی گفی بزونو
اشتن مِرَوونی نه من دَخونو
چمه ام سیسته دیلی ناله چندی
اشته سم وسرا نقاره مونو؟
بهشتی کو سره آوی نخوام از
بری من بیزاون خواوی نخوام از
هشی گرم آکر من زمینی کو
ده آسمونی کو آفتاوی نخوام از
ته فقد مِروونی لوزی زونی
گرفتاره ادمی خوب آزونی
بری چمه ضمانتی بکه رو
ته که پرزه نی اشتن کو نِرونی
اگه ایروزی سسی کو دگنم
چمه خسته نفسی کو دگنم
اگه الینگ بژن غم چمه پا
خوبه اشته د دسی کو دگنم
#فرزانه_قربانی
اولین و بزرگترین کانال تالشان
@taaleshestan
201 viewsحسين آذربخش, 08:43