2021-04-17 07:34:47
Հայոց Ցեղասպանութեան 106-րդ տարելիցի առիթով՝ Թ. Հ. թեմի Կենտրոնական յանձնախմբի աշխատանքները
Այս տարի լրանում է Հայոց Մեծ Եղեռնի 106-րդ տարելիցը: Թէեւ արդէն երկրորդ տարին է ինչ COVID 19-ի համաճարակի պատճառով, երկրում սահմանափակւած են միջոցառումները, սակայն Հայոց Ցեղասպանութեան 106-րդ տարելիցի միջոցառումները համայնքում նշելու նպատակով՝ Թ. Հ. Թ. Թեմական խորհրդի կողմից կեանքի է կոչւել Կենտրոնական յանձնախումբ, որը իր աշխատանքներն է տանում:
Առիթը պատեհ համարելով հարցազրոյց ենք նախաձեռնել Հայոց Ցեղասպանութեան 106-րդ տարելիցը նշող Թեհրանի հայոց թեմի Կենտրոնական յանձնախմբի ատենապետ՝ Ալեքս Կարապետեանի հետ:
Ալեքս Կարապետեանը անդրադառնալով յանձնախմբի տարած աշխատանքներին ընդգծել է. «Կենտրոնական յանձնախումբը իր անդրանիկ նիստը գումարել է մարտի 9-ին, սակայն նկատի առնելով կորոնավիրուսի հետեւանքով տիրող սահմանափակութիւնները, այս տարի եւս աշխատանքների ձեւը տարբեր է լինելու ընկալեալ սովորութիւնից»:
Անդրադառնալով այն հարցին, որ յանձնախումբը իւրաքանչիւր տարի ինչ որ կարգախօս է ընտրում եւ այդ կարգախօսի շրջագծում են ընթանում աշխատանքները, նա ընդգծեց, որ Արցախեան վերջին իրադարձութիւնները ապացուցեցին, որ անփոփոխ է թուրքերի հակահայ քաղաքականութիւնը, ուստի մենք չենք մոռանում մեր պահանջատիրութիւնը Թուրքիայից, որը համարւում է մեր առաջնահերթութիւնը:
Խօսելով ծրագրերի մասին, նա ընդգծեց, որ դրանք լինելու են առցանց եւ ապրիլեան ոգով տոգորւած, արդէն առցանց մի շարք նիւթեր ու տեղեկութիւններ հրապարակւում են եւ պատրաստւել է լոգօն:
Մեր սիրելի հայրենակիցները անցեալ տարի ապրիլի 23-ի երեկոյեան ի յարգանս մեր մէկուկէս միլիոն Սրբադասւած Նահատակների իրենց պատշգամբներում մոմավառութիւն կատարեցին, որը իրապէս գովելի նախաձեռնութիւն էր եւ այս տարի եւս դիմում ենք սիրելի հայրենակիցներին, որ կատարեն մոմավառութիւն, որի մասին իրազեկ ենք պահելու առաջիկայ շաբաթւայ մեր յայտարարութիւններով:
Անդրադառնալով Հայոց Ցեղասպանութեան Սրբադասւած Նահատակների յուշարձանի մօտ ծաղիկների մատուցման արարողութեանը նա նշեց, որ այն նախատեսւած է իրականացնել դռնփակ եւ ազգային իշխանութեան ու մարմինների սահմանափակ թւով ներկայացուցիչների մասնակցութեամբ, որը հանրութեանը կը ներկայացնենք առցանց՝ սոցցանցերի միջոցով:
Անդրադառնալով ոչ-հայ հայրենակիցներին Հայոց Ցեղասպանութեան իրողութիւնը պարզաբանելու անհրաժեշտութեան մասին, Ալեքս Կարապետեանը ընդգծեց, որ արդէն երկրորդ տարին է, որ կորոնավիրուսի համաճարակի հետեւանքով բացառւում է ոչ հայ հայրենակիցների համար եւս, միջոցառումը, ուստի առցանց համակարգով կարելի է ոչ հայերէնով տւեալներ ու փաստագրական ֆիլմեր տարածել Հայոց Ցեղասպանութեան մասին, որը եւս իրականացւել ու իրականացւում է Թեհրանում Հայ Դատի յանձնախմբի միջոցով:
Կարեւոր է նշել նաեւ, որ հայ աշակերտութեան մօտ պահանջատիրական ոգին վառ պահելու նպատակով՝ Թ. Հ. Թ. Կրթական խորհուրդը եւս կեանքի է կոչել ենթայանձնախումբ, որը աշակերտների համար պատկան ցանցի տեսակապի միջոցով աշխատանքներ է մշակում:
Վերջում նա ընդգծեց, որ երկրում կորոնավիրուսի պանդեմիայի հետ կապւած պայմաններում, յանձնախումբը եւս իր ծրագրերը կարող է փոփոխութեան ենթարկել, որոնց մասին հաղորդագրութիւններով իրազեկ ենք պահելու մեր համայնքի սիրելի հայրենակիցներին:
Բոլորս միասին պահանջատէր կեցւածքով, վառ պահենք մեր սրբադասւած նահատակների յիշատակը:
Հարցազրոյցը վարեց ԿԱՐԻՆԷ ԴԱՒԹԵԱՆԸ
Լուրը՝ Ալիքից
@tehranprelacy
734 viewsedited 04:34
Ա
