كنت بتكلم مع يوسف عن إمكانية إثبات وجود الخالق بالأدلة العقلية | إغدرَاسيل
كنت بتكلم مع يوسف عن إمكانية إثبات وجود الخالق بالأدلة العقلية، وبعد ما وصلنا لإثبات وجود الخالق جه السؤال المنطقي - طيب مادام لكل مخلوق خالق، يبقى مين خلق الله يا بابا ؟ - سؤال وجيه من إنسان جميل ، اسمع وركز معايا شوية علشان نوصل للإجابة بسهولة
لنفرض إنك يا يوسف عايز تاخد مصروف، فروحت لأمك فقالت لك حاضر بس لازم أستأذن من أبوك الأول ، وتاني يوم جت وادتلك المصروف ... ده معناه إيه ؟ - إنك وافقت أخد المصروف
- ممتاز جدا ، بس ممكن نترجمها إني ادتلك المصروف بإرادتي الشخصية من غير ما أحتاج أرجع لحد ... صح ؟ - أكيد
المصروف هنا ممكن تسمية " الأثر " و أمك نسميها " مؤثر يحتاج لمؤثر "، يعني هى لازم ترجع لحد تاني علشان تقدر تديك المصروف ، وأنا اسمي " المؤثر الغير متأثر " ، يعني أنا رأيى من نفسي ومش محتاج لحد أخد أذنه ... تمام ؟ - تمام
- طيب تعالى نتخيل الأمر نفسه كالتالي ، أمك قالت لك لازم أخد رأي أبوك، وأنا قلت لأمك لازم أخد رأي أخويا الأكبر مني شريف، وعمك شريف قال لازم اخد رأي الأخ الأكبر خالد ، وعمك خالد قال لازم أخد رأي مديري، ومديره قال لازم اخد رأي رئيس مجلس الإدارة .... وفضلنا كدة في سلسلة لا نهائية وكل واحد لازم ياخد رأي حد تاني ... النتيجة هتكون إيه؟ - عمري ما هاخد المصروف كدة
- شطور ... لو كل مؤثر محتاج لمؤثر غيره، وقتها الأثر عمره ما هيحصل لو علشان تاخد مصروفك لازم ندخل في سلسلة لانهائية من المؤثرين، عمر الاثر اللي هو المصروف ماهيحصل طيب لو بعد وقت أمك جت وادتلك المصروف ، معناه إيه؟
- إن حد كبير وافق - صح، معناه إننا وصلنا لمؤثر غير متأثر ، مؤثر بذاته وبنفسه
تعالى ننفذ المثال ده على فكرة المخلوق والخالق لو المخلوق احتاج لخالق، والخالق محتاج لخالق، والخالق الثاني محتاج لخالق غيره ... ودخلنا في سلسلة لانهائية من الخالقين ... إيه النتيجة ؟ - مممم عمرنا ما هنتخلق صح ؟
- ما أنت حلو أهه ... أيوه عمرنا ما هنتخلق، طيب بما إننا اتخلقنا بالفعل ، ده معناه إيه ؟ - إننا وصلنا لخالق مش محتاج خالق تاني
- شاطر، بما أن الخلق موجودين بالفعل، فده يدل على خالق غير مخلوق، وصلنا لخالق موجود بذاته ومؤثر لا يحتاج لمؤثر فوقه ... يبقى مين خلق الله؟
- مافيش، لأنه موجود بذاته - موجود بذاته وواجب الوجود ، خالق غير مخلوق الدليل العقلي ده إسمه دليل منع التسلسل في المؤثر ، لو كل مؤثر محتاج لغيره = عمر الأثر ما هيحصل لو حصل الأثر يبقى وصلنا لمؤثر بذاته لو حصل الخلق، يبقى وصلنا لخالق موجود بذاته وهو الله .
