2021-08-01 04:08:57
البارحة بنية كتبت ( اني احط اهداف وما انجزهم خلال اليوم )
وردوا هواي انو نفس الوضع شنو الحل ؟
- -
مبدئيا لازم نتفق ع شغلتين .
عدم تحقيق اهداف اليوم مو بالشرط انك سختچي لا
احتمال أنـتَ دتحط مهام واهداف اكبر من مقدرتك واكبر من انو يخلصن خلال وقت يومك
اما أنـتَ صاير هيرو وحاطلك مهام مال اسبوع بيوم ومبالغ واما أنـتَ شفت غيرك مصمم جدول وجيت ولطشته الك وهو ميناسبك ...
وهم ممكن أنـتَ سختجي عزيزي الطالب ..
ف اذا عالجت النقطه الفوك وكلت لا يابه اني دا احط ع اساس جدولي الخاص بيه والي يوالمني وحسب مقدرتي بس اني سختچي شسوي ؟
هنا تجي تفكر بسؤالين !
ليش تلتزم وتحققهم ؟
واذا مالتزمت شيصير ؟
جواب السؤال الاول هو حيكون " الدافع " الي دايماً چنت اكول اي انسان ملتزم ومستمر يدرس او يشتغل ع شي ف هذا بسبب الدافع
مو يكلك بالشعر الوجداني شعر الشاعر مرتبط بالدافع الذي يستثيره !
چا أنـتَ هم نفس الحالة !
لازم عدك دافع يخليك تستمر !
ف أنـتَ أسـأل نفسك ليش تلتزم ؟
ليش تقره ؟ ليش تريد فلان معدل ؟ والخ ....
وجواب السؤال الثاني اني اجاوبه !
حتندم في وقت لاحق ... حتتمنى كل ثانية ولحظة وكل رمشة عين رمشتها ببدال متقره انو ترجع وتغير الماضي حتى تعيش حاضر حلو !
ف أنـتَ هسه اشتغل ع حاضر قبل لا يصير ماضي و اضمن مستقبل حلو ...
واترك اترك اترك ( هاي كلث مرات ) التفكير السوداوي ونظرية المؤامرة الي حتسويها عليك التربيه بلاسئلة ومتجيب معدل
معليك
أنـتَ مسؤول عن السعي لا النتيجة !
هسه أنـتَ اسعى والله كريم شكو محضر العشا گبل الخباز ؟
واذا مطلعت معدل ؟ هسه أنـتَ دقرة وبعدين كول اذا مطلعت !
ودايماً تذكروا !
دايماً اكو وقت تتلاحگون بي لنفسكم بي هالوقت مو مفتوح يجي وقت ودگ ساعة الصفر ومتگدر تسوي شي .
الالتزام !
لازم عدك دافع ! وتفكير للايام جاية !
اني وين اريد اشوف نفسي ونفسيتي ؟
ونصيحة اخيرة الندم شي مو حلو ( عن تجربة ) الندم ياكلك مثل ما النار تاكل الحطب !
ف اي يلا گوم ادرس
280 viewsZahraa ALRamahy (جّکْلَيَتٌهّ ), 01:08