2021-12-09 18:48:03
سؤال؟
- هو انا اقدر ابدأ دلوقتي صفحة جديدة وانسى اللي فات ؟
= اه طبعا تقدر
يا ابني منهج الثانوية دا يخلص في شهر والله بالنسبة للي هتشوفه في الكلية
افتكر السنة اللي فاتت في الوقت اللي زي دا كنت تايه حرفيا
والمواد متراكمة عليا والهم كمان برضو
كان كل اللي املكه في الوقت دا شوية مذاكرة ضعيفة
بس الحمد لله كان معايا كام حاجة كدا هم اللي قدرت اوصل بيهم للكلية اللي حلمت بيها عارف هم ايه ؟
الحاجات دي والله كفيلة يخلوك تطلع القمر مش تطلع الاول على الثانوية
طب هم ايه الحاجات دي وبيعملوا ايه ؟
1- الدعاء ودا سلاحك الاهم في الثانوية
كنت بدعي ربنا بكل حاجة
بدعي ربنا افهم الحتة دي، ادعي ربنا اقدر اظبط نومي، ادعي ربنا أحل المسألة دي، بدعي ربنا اقدر اقعد وقت طويل على الكتاب،
وكمان لما كان نفسي اقابل المستر دعيت ربنا وربنا استجاب وكمان قعدت معاه في بيته 4 ساعات بالدنيا والله
والمستر طلع اعظم في الواقع مما بنشوفه على التليفزيون
يا جماعة خلوا عندكم يقين في ربنا
واطلب بعشم شديد
لو ما روحتش لربنا هتروح لمين؟
دا ربنا قال في كتابه: "وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ".
"وإذا كان الله معك فلا شيء يعجزك".
وأهم دعاء بالنسبة لي كان دعاء لازم تقوله قبل النوم لغاية ما تنام عليه وهو
"اللهم ارزقني الفهم ،واجعلني من الصابرين على طلب العلم ،واجعلني من الفالحين".
2- الصلاة ودي هي الحاجة اللي بتخلي ربنا يقبل دعاءك ويوفقك ودا الرابط بينك وبينه وهي سر كل نجاح وتوفيق ف اوعى تفرط فيها وتأخرها عن وقتها ابدا
3- العزيمة ودا السلاح اللي هيخليك تكمل الفترة الجاية
واصرارك هيخليك تراقب نفسك ويومك وتتخلى عن كل حاجة ممكن تعطلك
- السوشيال يتقفل طبعا والتليفون يتشال ومفيش نت ولا تليفزيون "اهم خطوة اخدتها في الثانوية اني مسكت تليفون نوكيا زراير"
الحاجات دي كلها هتطلعك برا المود وانت ما عندكش وقت لدا
عايز تفك عن نفسك هزر معاهم في البيت خمس دقايق وارجع كمل
- وعشان تضمن ان عزيمتك تفضل موجودة علق ورق على المكتب اكتب فيه حاجة بتحفزك عشان لو زهقت تقدر تكمل
انا مثلا كنت معلق الآيات دي
"وَأَنْ لَيْسَ لِلْإِنْسَانِ إِلَّا مَا سَعَى * وَأَنَّ سَعْيَهُ سَوْفَ يُرَى * ثُمَّ يُجْزَاهُ الْجَزَاءَ الْأَوْفَى"
يعني ربنا شايف انت بتعمل ايه كويس وهيديك على قد تعبك
وهيجازيك جزاء يرضيك
وما حدش هياخد اكتر من نصيبه
ف الآية دي كانت بتخليني اعمل اللي عليا من غير ما ابص ورايا
ف اوعى الشيطان يلعب بيك ويقنعك انك لو تعبت مش هتلاقي
كمان مش محتاج اقولكم إن أي كلمة من أستاذ محمد.. "الله يباركله" عامل حفاز قوي جدا كنت اول ما اسمعه احس اني بتغسل من جوا
4- ركعتين في الليل يا جماعة قبل ما تناموا خفاف كدا بس طول في السجود وحاول تبكي فيهم لربنا مش محتاج اتكلم عن عظمة قيام الليل وقد ايه هو يقدر يوديك في حتة تانية
وادعي ربنا فيهم كتير كتير في السجود وقوله كل اللي جواك يا ابني احنا ما لناش غيره والله
5- كل ما حاجة تقف معاك صلي على النبي عشر مرات واوعى تسيبها غير لما تخلصها وما تقولش بعدين لإن هو دا بعدين
6- عايز منك 10 دقايق قبل النوم ودول "اهم عشر دقايق في يومك"
تقعد فيهم كدا مع نفسك وتحاسب نفسك وتشوف يومك النهاردة كان كويس ولا لا، تشوف ايه اللي محتاج تطوره في المذاكرة، ايه اللي بيعطلك ف تتخلى عنه سواء قعدة صديق، مكالمات، نت، تليفزيون
وتظبط هتعمل ايه بكرا
7- ودي الحتة النفسية ودي مهمة جدا في الثانوية وبحكم إني قارئ كتب كتير وكدا وكنت طالع من الأوائل على الجمهورية في تحدي القراءة العربي ف كان عندي إلمام بيها شوية اللي هو ازاي يعني؟ هقولك
الثانوية دي لازم تمشي فيها بمبدأ سيدنا عمر - رضي الله عنه - في الحياة وهو "اعتزل ما يؤذيك" يعني أي حاجة بتضايقك وتقفلك من المذاكرة سواء شخص او مكان ابعد عنه خالص واقطع علاقتك بيه
* مش محتاج اقولك طبعا ان اكتر حاجة بتؤذيك في نفسك هي الذنوب واكتر حاجة بتخليك سليم نفسيا هي الطاعة
8- اقطعوا علاقتكم بالعالم كله
يا جماعة والله العظيم كان ليا زمايل كانوا متفوقين جدا بس بسبب انهم قعدوا يركزوا مع التأجيل ومع كورونا ضاعوا
وانتم السنة دي اللعب على النفسية صعب جدا
سواء كورونا او التابلت والزيطة دي
عارف ايه الحل ؟
- حط التلات آيات اللي فوق دول قدامك وركز فيهم هتلاقي فيهم راحتك
ربنا بيقولك فيهم
اعمل اللي عليك واحنا شايفينك.. هنجازيك الجزاء الاوفي
يعني الجزاء اللي تبقى مبسوط بيه وفخور بيه
ف اجتهد انت وما لكش دعوة بحاجة خالص
- المستر لما سألني في الحلقة قولتله يا مستر احلى حاجة ف الثانوية هي متعة الثانوية
ف المستر استغرب
قولتله يا مستر الثانوية بتخليك تقرب من ربنا اكتر من اي وقت في حياتك
ورمضان جاي ف استمتعوا بقى
وياريت تيجوا على نفسكم شوية وتبطلوا دلع
484 viewsAhmed Shaban Fouad, 15:48
م
